Foto: inform.kz
Kezdesý barysynda Prezıdenti Qazaqstan ulttyq kompanııalardy Gonkong pen Shanhaı bırjalaryna shyǵarý múmkindigin qarastyryp jatqanyn aıtty.
«Biz aýqymdy jekeshelendirý júrgizip jatyrmyz. Taý-ken óndirý, metallýrgııa, kólik jáne basqa da salalardaǵy kásiporyndardyń aktıvteri satylymǵa shyǵarylady. Taıaý jyldardyń ishinde biz «Qazaqtelekom», «Eır Astana», «QazMunaıGaz», «Qazaqstan temir joly», «Qazposhta» syndy iri ulttyq kompanııalardy IRO-ǵa shyǵarýdy josparlap otyrmyz. Biz nysandarǵa qatysty mámile jasaýda barynsha tartymdy usynysty aıqyndaý úshin sheteldik ınvestorlar tarapynyń suranystaryn zerdeleýdemiz», - dedi Nursultan Nazarbaev.
Bul rette Memleket basshysy ulttyq kompanııalardy satyp alýshylar arasynda azııalyq naryq basymdyqqa ıe ekenin basa aıtty.
«Biz kompanııalarymyzdyń Gonkong pen Shanhaıdyń bırjalyq alańdaryna shyǵý múmkinshilikterin qarastyryp jatyrmyz. Buǵan qosa, Shanhaı bırjasy endigi ýaqytta Astana halyqaralyq qarjy ortalyǵynyń strategııalyq seriktesi sanalady. Ony aǵymdaǵy jyldyń shildesinde ashýdy josparlap otyrmyz jáne sizderdi qatysýǵa shaqyramyz», - dedi Elbasy. Sondaı-aq ol Qazaqstanda bıznesti damytýdaǵy tıimdi sharttardy atap ótti.
«Búginde Qazaqstan tıimdi bıznes júrgizý úshin jańa múmkinshilkter men úlken áleýet bolyp otyr. Investısııalyq ahýaldy jaqsartý boıynsha jumystar turaqty júrgizilip, kásipkerlik salasyndaǵy zańnamalar yryqtandyrylýda. Dúnıejúzilik banktiń «Doing Business» reıtınginde Qazaqstan búginde 36 orynda tur. Biz EYDU Investısııa jónindegi komıtetiniń assosıalanǵan múshesi bolyp sanalamyz jáne Halyqaralyq ınvestısııalar jónindegi deklarasııaǵa qosyldyq», - dedi Elbasy.
Prezıdenti sheteldik ınvestorlar men bıznesmendermen ózara tıimdi is-qımyldy jolǵa qoıý maqsatynda arnaıy KazakhInvest jáne KazakhExport kompanııalarynyń qurylǵanyn atap ótti.
«Metallýrgııa, munaı hımııasy, mashına jasaý, azyq-túlik óndirisi syndy basymdyqqa ıe salalarda ınvestısııalyq jobalardy júzege asyrý barysynda korporatıvtik, jer jáne múlik salyqtarynan bosatý qarastyrylǵan. Mundaı salalarǵa sheteldik jumys kúshin tartý kvotasyz júzege asyrylyp, jer qoınaýyn paıdalanýǵa lısenzııa alý jáne kelisimsharttar jasasý sharttary jeńildetiledi. О́ıtkeni, bul nysandar Qazaqstannyń ındýstrıaldy-ınnovasııalyq damý ulttyq baǵdarlamasynyń quramyna kiredi», - dedi Nursultan Nazarbaev.
Sonymen qatar Memleket basshysy elimizde 11 arnaıy ekonomıkalyq aımaq, 24 ındýstrıaldy aımaq jumys istep turǵanyn aıtty. «Biz qytaılyq kompanııalardy osyndaı tıimdi sharttarmen bıznesin damytýǵa shaqyramyz», - dedi Elbasy.
Kezdesý barysynda Nursultan Nazarbaev Qazaqstanda agroónerkásip keshenindegi jobalardy júzege asyrýǵa shaqyrdy. «Agrarlyq sektorǵa aıryqsha nazar aýdaramyz. Bul rette Qazaqstannyń múmkinshilikteri orasan zor. Agroónerkásip keshenin damytý memlekettik baǵdarlamasy júzege asyrylyp jatyr. Ol aýyl sharýashylyǵy ónimderin óndirýshiler men qaıta óńdeýshilerge memlekettik qoldaýdy qarastyrady», - dep atap ótti Elbasy.
Prezıdenttiń aıtýynsha, bul sektordy damytýda jańa tehnologııalardy engizý arqyly ónimdilikti arttyrý jáne ony eksportqa shyǵarý basymdyq sanalady.
«Biz sońǵy jyldary alǵash ret Qytaıǵa aýyl sharýashylyǵy ónimderin eksporttaı bastadyq. Keshegi ótken kelissózder barysynda bul saýda-sattyqtyń qarqynyn arttyrýdy jalǵastyra beretindigimizdi atap óttik. Qytaılyq kompanııalardy agroónerkásip keshenindegi jobalardy belsendi júzege asyrýǵa shaqyramyz», - dedi Nursultan Nazarbaev. Sondaı-aq ol qytaılyq kompanııalardyń Qazaqstanda IT-startap salasyndaǵy jobalardy júzege asyrýyna qolaıly jaǵdaı jasalatynyn aıtty.
«Qazaqstan ekonomıkasyn jedel jańǵyrtýǵa jáne ınnovasııanyń jańa tehnologııalaryn engizýge baǵyt aldy. «Sıfrlyq Qazaqstan» dep atalatyn arnaıy memlekettik baǵdarlama júzege asyrylýda. Osyǵan baılanysty ekonomıka salalaryn sıfrlandyrý, ınnovasııalyq ekojúıeni damytý boıynsha jobalardy júzege asyrý mańyzdy», - dep atap ótti Elbasy.
Osy oraıda Memleket basshysy elimizde Nazarbaev Ýnıvresıteti, Innovasııalyq tehnologııalar parki syndy ınnovasııalyq klasterlerdiń jumys iste jatqandyǵyn basa aıtty.
«Aǵymdaǵy jyly Astanada IT-startaptar halyqaralyq tehnoparki ashylady. Munyń barlyǵy da sizdermen yntymaqtastyǵymyzdyń keleshegi zor alańy bola alar edi. Biz qytaılyq kompanııalardyń jumysy úshin qolaıly jaǵdaı jasaýǵa daıynbyz», - dedi Nursultan Nazarbaev.
