Bolashaq juldyzdardyń ata-anasy Nıkaragýada týyp-ósken. Azamat soǵysy men túrli qaqtyǵystan kóz ashpaǵan memlekette turaqtaýdy jón kórmegen olar jetpisinshi jyldary AQSh-qa qonys aýdarady. Baı-qýatty Amerıkada Lopester otbasynyń músheleri túgeldeı taekvondomen tabysady. Uldarynyń bul ermegin quptaǵan ákeleri óziniń kólik qoıatyn shaǵyn ǵana garajyn sport zalyna aınaldyrady. Sol jerde olar koreıler oılap tapqan ónerdiń qyr-syryna qanyǵady.
Kóp uzamaı eren eńbek óz jemisin berdi. Alǵashqy bolyp osy otbasynyń tuńǵyshy Jan Lopes AQSh ulttyq qurama komandasy sapyna shaqyrtý alyp, túrli dodalarǵa qatysady. Alaıda ol tolaǵaı tabystarǵa qol jetkize alǵan joq. Esesine týǵan inisi Stıven Lopes (1978 jyly týǵan) aǵasy armandaǵan belesterdi birinen keıin birin baǵyndyryp, tórtkúl dúnıedegi teńdessiz taekvondoshylardyń biri retinde óz esimin sporttyq shejirege altyn áriptermen jazdy. Atap aıtsaq, ol 2000 jyly Sıdneıde jáne 2004 jyly Afınyda ótken Olımpııa oıyndarynda altyn tuǵyrǵa kóterilip, álemniń 5 dúrkin chempıony atandy. Odan bólek, qurlyqtyq jáne basqa da asa iri halyqaralyq jarystarda jasyndaı jarqyrady.
Stıvennen keıin Mark Lopes (1982) óziniń myqtylyǵyn moıyndatyp, kóptegen baıraqty básekeden oljaly oraldy. Qos aǵasynyń jeńisti joly qaryndastary Dıanaǵa da (1984) juǵysty boldy. Ol da dara talantymen oqshaýlanyp, 2002 jyly Panamerıka oıyndarynyń jeńimpazy, 2005 jyly álem chempıony jáne 2007 jyly álem birinshiliginiń qola júldegeri atandy.
Biraz jyl boıy AQSh-ta bir otbasynan shyqqan úsh sportshynyń aldyn oraıtyn eshkim bolǵan joq. Sonyń nátıjesinde 2008 jyly Beıjiń Olımpıadasyna el namysyn qorǵaý sol sańlaqtarǵa júkteldi. Olardyń barlyǵy da artylǵan senimdi aqtap, uly dúrmekte mol oljaǵa keneldi. Tarqatyp aıtsaq, 57 keli salmaqta óner kórsetken Dıana jáne 80 keli salmaqta saıysqa túsken Stıven qola medaldi ıelense, 68 keli salmaq dárejesinde kúsh synasqan Mark kúmis júldeni moınyna ildi.
Mine joǵarydaǵy sýrette beınelengen taekvondoshylar otbasy – Lopesterdiń baǵyndyrǵan belesteri osyndaı.
Ǵalym SÚLEIMEN,
«Egemen Qazaqstan»
