Ustaz baqyty – shákirtiniń shattyǵyna kýá bolý, sony ózine mereı sanap, mártebesiniń artyp júrýi der edik.
Urpaqqa sabaq bolar ónege qaldyrǵan ulaǵatty ustazdyń qatarynda Jaqyp Baımuqanov ta bolǵan edi. Ol búkil sanaly ǵumyryn ustazdyqqa arnap, mektep basqarǵan bilikti azamat bolatyn. О́mirden ozǵanyna bes jyl bolǵan ustazdyń qurmetine jaqynda Almaty oblysy, Ile aýdany, Qosózen aýylyndaǵy №14 orta mektepte eske alýǵa arnalǵan bokstan oblystyq týrnır ótti.
Týrnırdiń ashylý saltanatynda mektep dırektory Kúlaıym Balyqbekova Jaqyp Baımuqanulynyń atalǵan mektepti jıyrma jyldan artyq basqarǵanyn, orys mektebin qazaq tildi ult mektebine aınaldyrǵanyn, birneshe tolqyn urpaq tárbıelegenin, jas ustazdardyń bilim-biligin arttyrý isine septigi tıgenin alǵa tartyp, aldaǵy ýaqytta ustazdyq atyn jańǵyrtý máselesin de qozǵady. Sol sekildi pedagogıka ǵylymdarynyń doktory, professor Tursynbek Baımoldaev jáne ózge de azamattar Jaqyp Baımuqanulynyń ult pedagogıkasyna qosqan úlesin atap aıtty.
Oblystyq týrnırge 20 komanda qatysty. Jastardyń sharshy alańdaǵy kezdesýin Olımpıada chempıony Ermahan Ybyraıymov ashyp, izbasarlaryna sáttilik tiledi. Týrnırge qatysqan 382 balanyń 25-i top jaryp, altyn medal men kýbokke ıe bolsa, ekinshi oryn alǵan 10 oqýshy kúmis medalǵa, al 5 oqýshy qola medalǵa qol jetkizdi.
Týrnır qorytyndysynda Ermahan Ybyraıymov mundaı jarystardy aýylda uıymdastyrýdyń mańyzyn atap aıtty. Sharanyń jaqsy ótýine qarjy jaǵynan demeýshilik jasaǵan, ásirese aýyl mektebiniń sport zalyn jóndeýden ótkizip bergen kásipker Ulan Baımuqanovqa, basqa da janashyr jandarǵa alǵys bildirdi.
Súleımen MÁMET,
«Egemen Qazaqstan»
Almaty oblysy,
Ile aýdany
