Sharaǵa Mádenıet jáne sport mınıstrligi Týrızm ındýstrııasy komıtetiniń tóraıymy Maınur Myrzamadıeva, Mádenıet jáne sport mınıstrligi týrızm ındýstrııasy komıteti tóraǵasy orynbasarynyń mindetin atqarýshy Jandos Bımaǵanbetov, «Týrıstik Qamqor» ujymdyq qorynyń tóraıymy Inna Reı, «Týrıstik Qamqor» ákimshilik júıesiniń dırektory Asylhan Esilov, Qazaqstan týragenttikteri assosıasııasynyń prezıdenti, «Týrıstik Qamqor» Korporatıvtik Qorynyń týragenttiktermen jumys jónindegi departament dırektory Ásel Nurkebaeva qatysty.
«Qazaqstanda 2016 jyldyń aıaǵynda zańnamalyq deńgeıde shetelge shyǵý týrızmi aıasynda azamattardyń quqyqtaryna kepildik berý júıesi engizildi. Osy shara týrıstik naryqtyń keıbir ókilderi tarapynan qazaqstandyq týrısterdiń kópshiligi shetelderde jatatyn oryndary tólenbeı nemese qaıtatyn bıletteri bolmaı qalýy sııaqty alaıaqtyq jaǵdaılardyń jıilep ketýine baılanysty qabyldandy. 2010 jyldan beri kóp jaǵdaıda týroperatordyń bankrot bolýymen, ne bolmasa alaıaqtyq jolmen, charterlik avıakompanııalar problemalarymen jalǵasqan jaǵdaılar tirkeldi. Osy ýaqyt aralyǵynda barlyǵy 12 myń adam zardap shekti, al shyǵyn kólemi ondaǵan mıllıon dollardan asyp tústi. Osy oqıǵalar aıasynda sheteldegi qazaqstandyqtarǵa shuǵyl kómek kórsetetin, qazaqstandyq týrısterdi Otanyna qaıtarýǵa kepildik beretin «Týrıstik Qamqor» qory quryldy. Qorǵa qatysýshy týroperator árbir joldanatyn týrıst úshin 0,5 AEK kóleminde aýdarym jasaýy tıis», dedi Mádenıet jáne sport mınıstrliginiń Týrızm ındýstrııasy komıtetiniń tóraıymy Maınur Myrzamadıeva.
Qazirgi sátte Kepildik berý júıesinde 59 týroperator jáne banktik kepildik usynatyn týroperator-frahtovatelder tirkelgen. Qazirgi kezde olar týrkodtar berip otyr. Zańnama aıasynda búgingi kúni www.fondkamkor.kz saıtynyń «Qatysýshylar tizimi» bóliminde berilgen kompanııalarmen jumys isteıdi. Monıtorıng derekteri boıynsha naryqty qamtý 80 paıyzdan astamdy quraıdy jáne áli 20-ǵa jýyq týroperator júıege kiredi dep kútilýde. Týrkod degen ne? Týrıstik kod 11-13 (shyǵatyn elge qatysty) qariptik-sandyq sımvoldardan turady. Ol ár joldamany resimdegen kezde avtomatty túrde beriledi. Bul shıfr árbir týrıst úshin aıryqsha nárse. Týrkod agenttiń elektrondy poshtasyna jiberiledi. Týrkodtar Qordyń týrlarynyń elektrondy tiziliminde saqtalady. Týrıst kútpegen jaǵdaıǵa tap bolǵan kezde Qormen baılanysyp, óziniń týrkodynyń nómirin habarlaıdy jáne shuǵyl túrde kómekti kútedi. Týrkod jeke paraqpen berilýi jáne joldamaǵa jazylyp berilýi múmkin. Týrkodtyń bolýy týrfırma arqyly shetelge demalýǵa baratyndardyń barlyǵy úshin mindetti bolyp tabylady. Eger týrıst týrfırma arqyly resimdeletin bolsa, ol mindetti túrde týrkodty alýy tıis. Iаǵnı týroperatorlar týrpaketti bergen kezde, týrkodty da birge berýge mindetti.
Raýan QAIDAR,
«Egemen Qazaqstan»
