Sport • Búgin, 08:15

Jarys kúndeligi

10 ret

kórsetildi

3 mın

oqý úshin

Italııada ótip jatqan XXV qysqy Olımpıada dodasynda short-trekten erler saıysynda Abzal Ájiǵalıev pen Denıs Nıkısha irikteý kezeńinen súrinbeı ótti. Qysqy Azııa oıyndarynyń chempıony Abzal Ájiǵalıev irikteý jarysynda márege birinshi bolyp jetip, shırek fınalǵa tikeleı ótti. Álem chempıonatynyń eki dúrkin kúmis júldegeri Denıs Nıkısha óz tobynda máre syzyǵyn úshinshi bolyp qıdy.

Qýanysh NURDANBEKULY

Shańǵymen tuǵyrdan sekirýden komandalyq jarysqa shyqqan Danıl Vasılev pen Ilıa Mızernyh birinshi kezeńniń qorytyndysynda jaqsy nátıje kórsetip, kelesi kezeńge ótkenimen, fınalǵa joldama buıyrmady – 11-oryn. Saıystyń erejesine sáıkes ár kezeńde sportshylar tek bir márte ǵana tuǵyrdan sekirdi. Irikteý synynan 12 qurama ótkenimen, fınaldyq tartysqa tek 8 komanda ǵana tústi. Jerlesimiz Ilıa Mızernyh munyń aldynda jekeleı synda úlken tuǵyrdan sekirýden 8-oryn ıelendi.

Olımpıadada taý shańǵysynan erler arasyndaǵy slalom saıysynda baq synaǵan otandasymyz Rostıslav Hohlov birinshi kezeńde jarys jolyn tolyq júrip óte almady.

Qysqy Olımpııa oıyndarynda konkımen júgirýden elimizge medal buıyrmaı tur. Áıelder arasyndaǵy saıysta Krıstına Sılaeva men Arına Ilıashenko 500 metr qashyqtyqta synǵa tústi. Sılaeva márege 38.33 sekýndta jetip, 18-oryndy mise tutsa, Ilıashenko 39.38 sekýndta júgirip ótip, 29-orynǵa turaqtady. 36.49 sekýnd ýaqyt kórsetken nıderlandyq Femke Kok Olımpıada chempıony atanyp qana qoımaı, tórtjyldyq dodasynyń rekordyn jańartty. Onyń otandasy Iýtta Lerdam 37.15 sekýnd nátıjemen kúmis júlde ıelense, japon qyzy Mıho Takagı (37.27 sekýnd) qola medal oljalady.

Qyrǵyzstanda erkin kúresten Super 4 Wrestling halyqaralyq týrnır ótti. Bishkek bozkileminde álem chempıony Rızabek Aıtmuhan fınaldyq tartysta reseılik balýan Álıhan Ksoevten basym túsip,
97 kg salmaq dárejesinde altyn medal oljalady.

Kolýmbııanyń Medelın qalasynda ártistik júzýden álem kýboginiń kezeńi ótti. Elimizdiń quramasy sapyndaǵy sańlaqtarymyz 2 altyn, 1 kúmis, 3 qola medal oljalap, jalpy komandalyq esepte 2-satyǵa turaqtady. Erler saıysynda Edýard Kım erkin baǵdarlamada úzdik nátıje kórsetip, altyn medal ıelense, áıelder quramasy erkin baǵdarlamada jeńimpaz atandy. Tehnıkalyq baǵdarlama synynda Vıktor Drýzın qola medal enshilese, qurama komanda toptyq akrobatıkalyq baǵdarlamada kúmis júlde ıelendi. Iаsmına Islamova men Aldııar Ramazanov juby tehnıkalyq baǵdarlamada, Nargıza Bolatova men Vıktor Drýzın erkin baǵdarlamada juptasyp óner kórsetýde qola júldege qol jetkizdi.