Tizimge engizilgen mamandyqqa ıe sheteldik joǵary bilikti kadrlarǵa elimizde turaqty turýǵa ruqsat alý múmkindigi beriledi. Bul tetik basym baǵyttarǵa qajetti mamandardy tartýdy kózdeıdi. Eńbek jáne halyqty áleýmettik qorǵaý mınıstrliginiń aqparattyq júıelerindegi derekterge sáıkes, bıyl da birqatar mamandyqqa kadr tapshylyǵy saqtalyp otyr.
Máselen, Enbek.kz portalynyń málimetinshe, «akýsher-gınekolog» mamandyǵynyń 469 bos jumys ornyna nebári 100 túıindeme jiberilgen. «Pedıatr» mamandyǵynda 448 shtat bos, oǵan 139 túıindeme túsken. «Anestezıolog-reanımatologtiń» 300 bos ornyna 75 túıindeme ǵana tirkelgen. Sonymen qatar onkolog, neonatolog, endokrınolog mamandaryna da suranys joǵary.
Aqparattyq tehnologııalar salasyndaǵy mamandarǵa da qajettilik artyp keledi. Atap aıtqanda, qoldanbaly baǵdarlamashylar (509 bos jumys orny), grafıkalyq dızaınerler (355 bos jumys orny) suranysqa ıe. Eńbek sharttaryn esepke alýdyń biryńǵaı júıesiniń derekterine sáıkes, suranysqa ıe mamandyq ıelerimen 45 myńnan astam eńbek sharty jasalǵan. Onyń ishinde baǵdarlamalyq qamtamasyz etý ázirleýshileri shamamen 8 myń, akýsher-gınekologter – 4,6 myń, pedıatrlar –
4,1 myń, qoldanbaly baǵdarlamashy-lar – 3,5 myń adam eńbek shartymen jumysqa ornalasqan. Sonymen qatar sheteldik jumyskerlermen 55 eńbek sharty rásimdelgen. Olardyń basym bóligi «avtomattandyrý ınjeneri» mamandyǵyna tıesili.
Byltyr Enbek.kz portalynda suranysqa ıe mamandar qajet dep 9 myńnan astam bos jumys orny jarııalandy. Derekter ishki eńbek naryǵy suranysqa ıe mamandyqtardyń basym bóligi jónindegi qajettilikti qamtamasyz etip otyrǵanyn kórsetedi. Degenmen, medısına mamandary turaqty túrde joǵary suranysqa ıe, salada kadr tapshylyǵy áli de ózekti.
