Tártip saqshylarynyń kásibı merekesine oraı ótken aıtýly sharaǵa IIM-niń M.Esbolatov atyndaǵy Almaty akademııasynyń bastyǵy, polısııa general-maıory Talǵat Qulybaev, Ulttyq ulan jáne ishki ister organdary ardagerler keńesiniń tóraǵasy, mılısııa general-maıory О́mirzaq Bolsambekov, mılısııa general-maıory Rústem Qaıdarov, polısııa general-leıtenanty Vasılıı Sımachev, Almaty qalalyq IID ardagerler keńesiniń tóraǵasy, otstavkadaǵy mılısııa general-maıory Saǵynjan Asyl-Keneı jáne taǵy da basqa shendiler qatysty.
Osy saltanatty shara barysynda KSRO IIM-niń qurmetti qyzmetkeri, mılısııa general-maıory Maqan Esbolatovqa arnalǵan bıýsttiń ashylý rásimi ótti. Aıtýly azamattyń esimi kópshilikke jaqsy tanys. Ol 45 jyldan asa ýaqyt boıy osy salada jemisti eńbek etti. 1973-1980 jyldar aralyǵynda Qazaq KSR-niń Ishki ister mınıstri boldy. О́z isiniń bilgir mamany, ultynyń adal perzentiniń eńbegi laıyqty baǵalanyp, ár jyldary Maqan Esbolatuly túrli memlekettik nagradalarmen marapattaldy.
Merekelik shara barysynda Akademııa kýrsanttarynan quralǵan jıyntyq jasaq jaýyngerlik qabiletterin baıqatyp, óz ónerlerin ortaǵa saldy. Sonymen qatar, konserttik baǵdarlama kópshilik nazaryna usynyldy.
Akademııa jaıynda qysqasha málimet bersek, osy bilim oshaǵynda qyzmet atqaratyn 450-den astam jeke quram bar, onyń ishinde 80-nen astamynyń ǵylymı dárejesi bar. Sonymen qatar joǵary bilikti professorlyq-oqytýshylar quramy qyzmet etedi, al kýrsanttar sany 1000-nan asady. Akademııada joǵary oqý ornynan keıingi jáne qosymsha bilim berý ınstıtýttary, 15 kafedra 3 oqý ortalyqtary jumys isteıdi. Qazirgi tańda Akademııa «Quqyq qorǵaý qyzmeti» boıynsha bakalavr, magıstratýra jáne PhD doktorontýra, 2013 jyldan bastap, «Aqparattyq júıeler» jáne «Radıotehnıka, elektronıka jáne telekommýnıkasııalar» mamandyqtary boıynsha mamandar daıyndaıdy. Táýelsizdik jyldarynyń basynan beri atalmysh Akademııany bitirgen 22 qyzmetker polısııa generaly ataǵyn aldy.
Ǵalym SÚLEIMEN,
«Egemen Qazaqstan»
ALMATY
