Suhbat barysynda Q.Ábdirahmanov Qytaı Halyq Respýblıkasynyń AО́SShK tóraǵasy qyzmetindegi (2014-2018 jyldar) jumysyn joǵary baǵalady.
Taraptar Forýmdaǵy tóraǵalyqty QHR-dan Tájikstanǵa berý, Keńestiń Besinshi sammıtin ótkizý máselelerin, sondaı-aq AО́SShK úderisin odan ári damytý keleshegin talqylady.
Syrtqy saıasat vedomstvosynyń basshysy Keńestegi yntymyqtastyqtyń barlyq bes ólshemi boıynsha – áskerı-saıası, ekonomıkalyq, adamı, ekologııalyq ólshemder jáne jańa syn-tegeýrinder men qaterler salasynda is júzindegi yqpaldastyqty údetý mańyzdylyǵyn atap ótti.
«AО́SShK 4-shi Shanhaı sammıtinde aıtylǵan Qazaqstan Respýblıkasynyń Prezıdenti Nursultan Nazarbaevtyń Keńes negizinde Azııadaǵy qaýipsizdik jáne damý uıymyn (AQDU) qurý bastamasyn, sonyń ishinde «ekinshi trek» sheńberinde jumys atqarý arqyly, halyqaralyq ǵylymı jáne akademııalyq toptardy tarta otyryp, iske asyrý ózekti bolyp qalyp otyr», dedi mınıstr.
Taraptar AО́SShK sheńberindegi ózara yqpaldastyqtyń tıimdiligi men nátıjeliligin arttyrý, sondaı-aq forým quramynyń geografııasyn keńeıtý boıynsha jumystardy jalǵastyrý, syrtqy baılanystardy ulǵaıtý, óńirlik jáne halyqaralyq isterge keńinen qatysý qajettigi týraly bir pikirge kelisti.
AО́SShK shaqyrý týraly tuńǵysh bastama Qazaqstan Prezıdenti N.Nazarbaev tarapynan 1992 jylǵy 5 qazanda BUU Bas Assambleıasynyń 47-shi sessııasy barysynda kóterilgen bolatyn. Bul bastamanyń negizgi maqsaty – Azııadaǵy beıbitshilik pen qaýipsizdikti qamtamasyz etý úshin tıimdi qurylym qurý nıeti bolyp tabylady.
Búgingi tańda Keńeske 26 memleket múshe. Onyń jumysyna 9 memleket pen 5 halyqaralyq uıym baıqaýshy retinde qatysady. AО́SShK Hatshylyǵy Astana qalasynda ornalasqan.
Sol kúni Q.Ábdirahmanov Aýstrııa elshiligi saýda bóliminiń ekonomıka máseleleri boıynsha keńesshisi – «Advantage Austria» Aýstrııa halyqaralyq saýda agenttigi qurǵan alǵashqy Almatyda ashylǵan ofıstiń basshysy Mıhael Mıýllerdi qabyldady. Kezdesý barysynda Saýda bólimniń Qazaqstan-Aýstrııa baılanystaryn tereńdetý isine qosqan úlesi atap ótildi. Saýda bóliminiń qoldaýymen Astanada 27-28 maýsymda Qazaqstan-Aýstrııa aımaqtar forýmy ótti.
Joldybaı BAZAR,
«Egemen Qazaqstan»
