Forýmdy Qazaqstannyń Energetıka mınıstrligi, Syrtqy ister mınıstrligi, Astana qalalyq ákimdigi jáne Avantage AUSTRIA Almaty (Aýstrııa elshiliginiń Saýda bólimi) uıymdastyrdy. Oǵan Energetıka mınıstriniń birinshi orynbasary Mahambet Dosmuhambetov, Syrtqy ister vıse-mınıstri Erjan Ashyqbaev, Aýstrııanyń Qazaqstandaǵy elshisi Gerhard Saıller, Qazaqstannyń Aýstrııadaǵy Tótenshe jáne ókiletti elshisi Qaırat Sarybaı jáne basqalar qatysty.
Forýmda kóterilgen negizgi taqyryp – Qazaqstannyń turaqty damýyna septigin tıgizetin aýstrııalyq «jasyl» tehnologııalardy belsendi qoldanysqa engizý. Astanaǵa kelgen 16 kompanııa álemdik rynokta Aýstrııany jańǵyrmaly energııa kózderi sektoryn «jasyl» qurylys, qaldyqtardy basqarý, sýdy tazalaý jáne «aqyldy qala» salalary boıynsha tanytýda. Sonyń ishinde ekeýi Qazaqstanda da óz qoltańbasyn qaldyryp úlgerdi. Atap aıtqanda, Astanada jańadan ashylǵan Ryskeldi qajy meshitiniń jobasyn osy eldiń Weissenseer GmbH jáne Neubau GmbH kompanııalary jasaǵan. Ol múlde dástúrli energııa kózin qoldanbaıtyn álemdegi birinshi meshit bolyp tabylady. «Aımaqtar forýmynyń Astanada ótýiniń óz máni bar. Biz Ekspo-2017 halyqaralyq kórmesine tabysty qatystyq, osy shara sol kórmeniń zańdy jalǵasy ispettes, qazaq bıznesmenderin «jasyl» tehnologııalardy belsendirek engizip, qoldanýǵa shaqyramyz. Aýstrııa «jasyl» tehnologııalardy qoldanysqa engizýde álemniń aldyńǵy qatarynda. О́ndiris pen ekonomıkany «jasyl» tehnologııalar arqyly turaqty damytýǵa den qoıýda. Eldegi jańǵyrmaly energııa kózderinen alynatyn jalpy energııanyń kólemi 80 paıyz, al elektr qýaty, jylý jáne kólikke jumsalatyny 33 paıyzǵa deıin jetedi. Osy oraıda «jasyl» tehnologııalardy qoldanýǵa baılanysty eki el aımaqtarynyń ókilderin jınap, ózara tanystyrý jón dep sheshtik. Biz osy forýmdy uıymdastyrǵan Qazaqstannyń Energetıka mınıstrligine, Syrtqy ister mınıstrligine, Astana qalasynyń ákimdigine alǵys aıtqymyz keledi», dedi forýmdy ashqan Qazaqstandaǵy Aýstrııa elshiliginiń Saýda bólimi basshysy Mıhael Mıýller.
Budan soń sóz alǵan Energetıka birinshi vıse-mınıstri Mahambet Dosmuhambetov eki eldiń qarym-qatynasy qarqyndy damyp kele jatqandyǵyn jetkizdi.
Al Aýstrııanyń Kólik, tehnologııalar jáne ınvestısııalyq jobalar federaldy mınıstrliginiń basshysy, bas hatshy Andreas Raıhardt óz eliniń Úkimeti atynan sóz sóıledi. ol Aýstrııanyń jańǵyrmaly energııa kózin jasap shyǵarýda tájirıbesi moldyǵyn, energııalyq tıimdilikti damytyp, olardyń paıdaly qazbalar men ıadrolyq energetıkadan tolyq bas tartýǵa daıyndalyp jatqanyn jetkizdi.
Al Erjan Ashyqbaev forým jumysyna sáttilik tileı kele, qatysýshylarǵa Qazaqstannyń búgingi saıası-ekonomıkalyq baǵyty týraly keńirek túsindirip ótti. Eldiń syrtqy qarym-qatynastarynyń jedel damyp, atap aıtqanda, elge vızasyz kirý múmkindikteri qarastyrylǵanyn aıtyp ótti. E.Ashyqbaevtyń aıtýynsha, Aýstrııanyń sıfrlandyrý salasy boıynsha jasaǵan jańa jobalary, ınnovasııalyq sheshimderi úırenýge turarlyq tájirıbe. Sondaı-aq tabıǵat resýrstaryn tıimdi paıdalanatyn, qoǵamyna «jasyl» tehnologııany belsendi engizgen aýstrııalyqtardyń Qazaqstannyń energetıkalyq áleýetin damytýǵa qosyp jatqan úlesine rızashylyǵyn bildirdi.
Venera TÚGELBAI,
«Egemen Qazaqstan»
