Jobanyń jalpy quny – 280 mln teńge. Balabaqshalardyń ashylý saltanatynda oblys ákimi Janseıit Túımebaev taǵdyrdyń salǵanyna eriksiz moıynsunǵan jas jetkinshekterge qolushyn sozyp, kómek bergen kásipkerge alǵysyn bildirdi. Sondaı-aq oblys ákimi demeýshilik jasap júrgen kásipkerdiń eńbekteri ózgelerge úlgi bolarlyq shynaıy patrıotızmniń kórinisi ekenin aıtyp ótti.
– Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda týǵan jerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy qoldaý kerektigi, bul – qalypty jáne shynaıy patrıottyq sezimniń árkimde bolýy aıtylǵan bolatyn. Memleket basshysy kásipkerlerdiń áleýmettik jaýapkershiligin nazarynan tys qaldyrǵan emes. Iаǵnı memlekettik qoldaý kórsetilip, kásipkerliktiń damýyna barlyq jaǵdaı jasalyp keledi. Biz de múmkindigimizshe muqtaj jandarǵa kómektesip, elimizde áleýmettik jaǵdaıdyń jaqsara túsýine úles qosýymyz qajet. Osy oraıda bizdiń kompanııa júzden astam balaǵa qýanysh syılap otyr. Igi ister aldaǵy ýaqytta da jalǵasyn tabatyn bolady, – deıdi bıznesinen túsken tabysynan jyl saıyn eldiń ıgiligi úshin áleýmettik mańyzy bar nysandy tapsyryp otyrýdy ustanym etken Qaırat Moldaseıitov.
Jalpy, ońtústikte «Rýhanı jańǵyrý» baǵdarlamasy aıasynda kásipkerler demeýshiligimen kóptegen áleýmettik nysandar salynyp, el ıgiligine berilýde. Aıta ketelik, Túrkistan oblysynda «Astananyń 20 jyldyǵyna – 20 nysan» aksııasy júrip jatyr. Mereke qarsańynda oblysta jáne Shymkent qalasynda áleýmettik nysandar men kásiporyn salasynda 20 nysandy el ıgiligine berý kózdelgen. Paıdalanýǵa beriletin nysandardyń qatarynda 4 balabaqsha, Shardara aýdanynda 10 páterli eki qyzmettik turǵyn úı men Tóle bı aýdanynda 20 páterli bes qabatty, al Báıdibek aýdanynda 1 páterli 20 kommýnaldyq turǵyn úı bar.
Ǵalymjan ELShIBAI,
«Egemen Qazaqstan»
Túrkistan oblysy
