Álem chempıonaty-2018. «Nemis mashınasy» syr berdi

2002 jyly álem chempıony degen ataǵy bar Fransııa óz tobynan shyǵa almaı, uıatty boldy. Sátsizdik Italııany 2010 jy­ly aıaqtan shaldy. Ońtústik Afrı­kaǵa chempıon ataǵymen kelgen «skýadra adzýrra» ata­ǵyn qorǵaı almady. Al sol jy­ly chempıon bolǵan Ispanııa araǵa tórt jyl salyp Brazılııa jerin­de kúıredi. Endi mine, kezek Ger­manııaǵa keldi. Alǵashqyda Mek­sıkadan jeńilgen kezde nemis­ter asa qatty shý kótere qoı­mady. Ýaqytsha sátsizdik ótedi de ketedi dedi. Ioahım Lev te sabyr saqtady. Kelesi oıyn Shve­sııaǵa qarsy bolyp, nemister sońǵy sekýndta jeńisti julyp ketti. Áıtpegende eki týrdan keıin-aq úmit úzilgeli turǵan. Tonı Krosstyń soqqan ǵalamat goly býndes komandany bir ajal­dan qutqardy. Biraq odan keıingi oıyn múlde bólek ótti. Ońtústik Koreıany qalpaqpen uryp alamyz dep asylyq sóılep shyqqan almanııalyqtar opyq jep qaldy. 90 mınýt boıy bir gol soǵa almaı, 3 upaıǵa zárý boldy. Amal qalmaǵan soń, taıly tuıaǵymen shabýylǵa shyqty da, óz qaqpasyna 2 dop jiberip aldy. Tipti Manýel Noıerdiń ózi qaqpany bos qaldyryp, shabýylǵa dem berdi. 

Al qatar ótip jatqan oıynda Shvesııa Meksıka qaqpasyna 3 gol soǵyp, nemisterdiń jaǵdaıyn jaqsartqanymen Mesút О́zil bastaǵan jigitter múmkindikterin paıdalana almady. Nátıjesinde, birinshi oryndy Shvesııa, ekinshi oryndy Meksıka ıemdendi. Endi pleı-off satysynda Mek­sıka Brazılııamen, Shvesııa Shveısarııamen kezdesedi. Bir qyzyǵy, bıyl, 2018 jyly osy eki memlekettiń hokkeıden ulttyq quramalary álem chem­pıo­natynyń fınalynda ushyrasyp edi. Ol oıynda skan­dınavııalyqtar chempıondyq ataǵyn qorǵap qaldy. 

Álem chempıonatynan Germa­nııa ketkenimen, odan ózge favorıtter din aman. Jarysty odan ári jalǵastyryp, pleı-off satysyna shyǵyp aldy. 1/8 fınaldyń basty oıyny Fransııa men Argentına arasynda ótetini anyq. Al sondaı-aq Ýrýgvaı men Portýgalııanyń da kezdesýi tartysqa toly bolatynyna senim mol. Eger Portýgalııa shırek fınalǵa ótse, al Argentına fransııalyqtardy tizerletse, onda Leonel Messı bastaǵan komanda Krıshtıaný Ronaldýdyń ujymyna qarsylas atanady. Jankúıer qaýymynyń kútip otyrǵany da osy. Eki júıriktiń qaısysy myqty ekenine sol oıynda jaýap alamyz deıdi. Biraq bir aıta keterligi Portýgalııa da, Argentına da 1/8 oıyndarynda favorıtter qataryna jatpaıdy. Qaqpasyna áli gol jiberip kórmegen Ýrýgvaı Portýgalııany Kavanı men Sýaresterdiń arqasynda ábigerge salary sózsiz. Al Mbappe, Jırý, Grızman bastaǵan fransııa­lyq­tar qor­ǵa­nysy osal Argentınany qys­paqtap kóredi. Toptyq kezeń aıaq­talyp, komandalar óz oıyndaryna daıyndalýy úshin búgin FIFA kúntizbege eshqandaı oıyndy josparlaǵan joq. 

Bıylǵy birinshilik goldarǵa baı bolyp tur. Kúni keshe ǵana Shveısarııa – Kosta-Rıka ara­syndaǵy oıynda Soltústik Amerıkadan kelgen qonaqtar gol soqty da, mýndıal esep-qısabyna erekshe ózgeris engizdi. Buryndary chempıonatqa kelgen komandalardyń birnesheýi gol soqpaı qaıtyp ketýshi edi. Bul joly Reseıge at terletip kelgen 32 komandanyń barlyǵy da goldan quralaqan emes. Aıtpaqshy gol degennen shyǵady, bıylǵy chempıonat osy kezge deıingi birinshilikter tarıhynda eń kóp av­togol soǵylǵan jarys bolyp tur. Meksıka-Shvesııa oıy­nynda Edson Alvares óz qaq­pasyna gol soǵyp aldy da, bıyl­ǵy dodadaǵy 7-avtogoldy tirkedi. 

Tartysqa toly aladop alamany aldaǵy kúnderi qalyń kórermendi qaıtadan qyzyqqa batyrǵaly tur.

Ermuhamed MÁÝLEN,
«Egemen Qazaqstan»