«Sportıng» Sınısha Mıhaılovıchpen 18 maýsym kúni kelisimshartqa otyrǵanymen, klýbtyń jańa prezıdenti Soýza Sıntra serbııalyq mamanmen aradaǵy kelisimshartty buzdy. Sıntranyń aıtýynsha, bas jattyqtyrýshymen 10 kúnniń ishinde kelisimshartyn buzýynyń basty sebebi – Mıhaılovıch komandanyń aldaǵy maýsymnyń josparyna enbegeni.
Klýb prezıdenti apta sońyna deıin komandanyń jańa bas bapkeriniń esimin jarııalaıtynyn málimdegen.
Kezdesý ýaqyty jarııalandy
Amerıkalyq BoxingScene basylymynyń jazýynsha aýyr salmaqtaǵy WBA/IBF/WBO belbeýiniń ıegeri brıtanııalyq Entonı Djoshýa (21-0, 20 KO) men WBA beldiginen úmitker reseılik Aleksandr Povetkın (34-1, 24 KO) arasyndaǵy jekpe-jek 22 qyrkúıekte Brıtanııada ótedi dep josparlanǵan.
Buǵan deıin WBA Djoshýanyń komandasyn 24 saǵattyń ishinde Povetkınmen jekpe-jek ótkizýge mindettegen bolsa, Entonıdiń promoýteri Eddı Hern óziniń bir suhbatynda Aleksandrmen kelisimge kelýge jaqynbyz dep málimdegen edi. «Eger bári jospar boıynsha ótetin bolsa, Djoshýa-Povetkın jekpe-jegin qyrkúıek aıynda ótkizemiz. Bul aıqastan soń Ýaıldermen kezdesemiz, eger ol kelisimshartqa qol qoısa», deıdi Eddı.
Aıta keteıik, eger Djoshýa-Povetkın jekpe-jegi uıymdastyrylatyn bolsa, bul aıqas AQSh-ta tuńǵysh ret DAZN júıesi arqyly tikeleı efırde usynylmaq.
«Mılan» Eýrokýboktan shettetildi
Italııanyń «Mılan» klýby qarjylaı Fair Play erejesine baǵynbaǵany úshin ÝEFA tarapynan jazaǵa tartyldy.
ÝEFA resmı saıtynyń taratqan málimetine qaraǵanda, «rossonerıler» aldaǵy eki jyl kóleminde Eýrokýbok básekelerinen shettetildi. Osy máselege oraı, «Mılan» komandasy bir kún ótken soń sotqa apellıasııalyq shaǵym bergen. Komanda basshylarynyń aıtýynsha, apellıasııadan keıin ÝEFA jaza merzimin eki jyldan bir jylǵa deıin shegerýine úmit bildirýde.
Aıta keteıik, Italııa «A» serııasynyń ótken maýsymynda «Mılan» komandasy altynshy oryn ıelenip, Eýropa lıgasynyń toptyq kezeńine joldama alǵan bolatyn. Endi bul joldama «Fıorentına» komandasyna beriledi.
Daıyndaǵan
Álı BITО́RE,
«Egemen Qazaqstan»
