Sýretter Aqordanyń baspasóz qyzmetinen alyndy
Elbasy kezdesý barysynda bokstan álem chempıony Gennadıı Golovkınge iltıpat bildirip, qazaqstandyqtar onyń kásibı sporttaǵy jarqyn jetistikterin maqtan tutatynyn aıtty.
– Otandastarymyz seniń jekpe-jekterińdi jiti baqylap otyrady. Sen Qazaqstandy laıyqty túrde tanytyp, óz otanyńdy eshqashan umytpaı, júrgen jerde aıtyp júresiń. Biz seni maqtan tutamyz. Qyrkúıek aıynda seni óte mańyzdy jekpe-jek kútip tur. Barsha qazaqstandyqtardyń atynan saǵan jeńis tileımin, – dedi Qazaqstan Prezıdenti.
Nursultan Nazarbaev Gennadıı Golovkınniń Qazaqstan sportyn tanytýdaǵy jáne elimizdiń halyqaralyq ımıdjin arttyrýdaǵy zor rólin atap ótti.
– Sen óz salmaǵyńda eshkimge des bermediń, saǵan jeńilis tappaǵan eń úzdik nokaýter boksshy degen ataq berildi. Bul – zor jetistik ári bizdiń sportymyz ben búkil Qazaqstandy nasıhattaýdyń jarqyn mysaly. Biz seniń erik-jigerińdi joǵary baǵalaımyz. Eger Qazaqstanda jekpe-jek ótkizýge múmkindik bolsa, biz oǵan jaǵdaı jasap, qol ushyn beremiz, – dedi Memleket basshysy.
G.Golovkın jeke qoldaý kórsetkeni úshin jáne Qazaqstannyń sportyn, sonyń ishinde boks mektebin damytýǵa zor kóńil bólgeni úshin Nursultan Nazarbaevqa alǵys bildirdi.
– Men óz tarapymnan elimizdi halyqaralyq arenada odan ári tanytý úshin bar kúsh-jigerimdi jumsaımyn. Eger bári oıdaǵydaı bolyp jatsa, Qazaqstanda jekpe-jek ótkizý josparymyzda bar. Halqymyz osyndaı aıtýly oqıǵany tamashalaýǵa ábden laıyq dep esepteımin. Mańyzy zor osyndaı jekpe-jekti barsha jurt kórgisi keledi degen oıdamyn, – dedi G.Golovkın.
Sonymen qatar boksshy Qazaqstan Prezıdentine WBC, WBA (Super), IBO jáne IBF tujyrymdary boıynsha kásipqoılar arasynda bokstan alǵan chempıondyq beldikterin syıǵa tartty.
Sońynda Nursultan Nazarbaev G.Golovkındi «Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev» ordenimen marapattady.
