Resmı derekterge súıensek, jyl saıyn Qazaqstanda balalar men jetkinshekterdiń 91 paıyzy jazǵy demalysyn 11 myńnan astam túrli úlgidegi saýyqtyrý keshenderinde ótkizedi eken.
Aqmola oblystyq bilim basqarmasynyń málimetinshe, 2017-2018 oqý jylynda 1-10 synyp oqýshylarynyń sany 111700 jetkinshekti qurady. Aǵymdaǵy jaz mezgilinde 110583 bala oqý-saýyqtyrý jobalaryna qatysady. Bul – jetkinshekter quramynyń 99 paıyzdyq kórsetkishi. О́ńir boıynsha oqýshylardy saýyqtyrýmen 13 memlekettik jáne 6 jekemenshik lager aınalysady. Memlekettik lagerlerdiń segizi tabıǵı sý qoımalarynyń mańynda ornalassa, qalǵan beseýiniń ashyq aspan astyndaǵy basseınderi bar. Mundaı nysanǵa Zerendi aýdanyndaǵy «Suńqar» lageri jatady.
Aqmola oblysynda jazǵy demalysty uıymdastyrý boıynsha qyzý jumys júrgizilýde. Máselen, oblystyń 650-ge jýyq bilim ordasy qyzyqty jazǵy baǵdarlamalar men arnaıy jobalar usynyp otyr. Sonymen qatar oqýshylardyń tanymdyq qyzyǵýshylyqtaryn damytý maqsatynda aǵylshyn tilin úırenýge arnalǵan baǵdarlamalar uıymdastyryldy. Jas ekologtar jazǵy demalystaryn shatyrly, kıiz úı, ekologııalyq jáne sporttyq lagerlerde ótkizý múmkindigine de ıe bolýda. Jazǵy oqý-saýyqtyrý mekemelerine jiberý joldamasyna kóp balaly otbasynan shyqqan, jetim, qamqorshysynan aıyrylǵan, múgedek balalar ıe.
Jyl saıyn oblystyq bilim basqarmasy sanıtarlyq-epıdemıologııalyq qyzmet ókilderimen birlese otyryp, elimizdiń memlekettik balalar saýyqtyrý lagerlerin josparly túrde tekseristen ótkizedi. Tekseris nátıjesinde 2017- 2018 jyldar aralyǵynda zańsyz jumys isteıtin lagerler anyqtalǵan joq. Oqýshylardyń áskerı-patrıottyq sezimin arttyrý maqsatynda «Zvezdnyı» balalar saýyqtyrý ortalyǵynda 200-den astam balany qamtıtyn shatyrly keshen uıymdastyrylyp, alǵashqy demalýshylaryn qarsy aldy. Mektep oqýshylary men stýdentterge arnalǵan «Uly Dala eli» atty týrıstik-aımaqtyq zertteý ekspedısııasy tamyz aıyna deıin jalǵasyn tabady. Bul aýqymdy jobada 5 myńnan astam qatysýshy el tarıhy men shejiresin zerdeleıtin bolady. Quramyna 500 adamdy jınaǵan týrıstik top Býrabaı aýdanynda respýblıkalyq jıyn ótkizse, 10 myńǵa jýyq oqýshy Aqmola oblysy jáne elimizdiń basqa da aımaqtaryna sapar shekpek. Sondaı-aq júzden astam mektep oqýshysy aýyl ómirin zerttep, salt-dástúrlermen tanysýǵa baǵyttalǵan «Bir apta aýylda» áleýmettik bastamasyna qatysý nıetin bildirdi.
Botakóz AMALBEK,
L.N.Gýmılev atyndaǵy EUÝ saıasattaný jáne jýrnalıstıka fakýltetiniń stýdenti
Aqmola oblysy
