Jalpy, baıqaýǵa 10 elden 19 arý qatysty. Olardyń ishinde Qazaqstannan - Roza Iаrlabekova, Ásem Esengeldınova jáne Ksenııa Iаkımchık, Armenııadan - Romella Tamarıan, Ýkraınadan - Tatıana Akýlenko, Lıka Shevchenko men Oksana Levchenko, Grýzııadan - Annamarııa Kacheıshvılı jáne Lıka Torııa, Tájikstannan - Malıkaboný Kaıýmova men Nazıra Mırzoeva, Belarýstan - Vıktorııa Lavrenko men Anna Panamareva, Reseıden - Arına Zınchenko, Vıktorııa Volgına jáne Janara Hasenova, Latvııadan - Larısa Agafonova, Qyrǵyzstannan - Sýsanna Egorıan, sondaı-aq, О́zbekstannan - Darıa Masalskaıa bar. Qatysýshylardyń jasy - 18-30 arasy.
Reseıdiń atynan synǵa túsken Janara Hasenova - etnıkalyq qazaq. Janar ózge elde tursa da, óz elindegi joǵary oqý ornyna túskisi keledi.
«Men Chelıabi oblysynyń Magnıtogorsk qalasynda dúnıege keldim. Ata-anam da sol jaqta týdy. Máskeýde ótken «Reseı arýy» baıqaýyna qatysyp, birinshi oryn alǵan bolatynmyn. Sodan osy baıqaýǵa joldama aldym. Jaqynda mektepti bitirdim. Qazir abıtýrıentpin. Astanadaǵy joǵary oqý oryndarynyń bireýine túsetin oıym bar», - dedi J.Hasenova.
Búgingi baıqaýǵa atyshýly Sýsanna Egorıan da qatysty. Byltyr ol «Qyrǵyzstan arýy» ataǵyn jeńip alǵannan keıin World Next Top Model 2017 Halyqaralyq baıqaýyna qatysqan bolatyn. Fınalda Sýsanna Armenııanyń jazýymen shyqty. Sol úshin qyrǵyzstandyqtar ony qatty synǵa aldy. Osy joly Sýsanna óz eliniń ataýy jazylǵan lentamen birge qyrǵyz xalqynyń ulttyq kıimin de kıip shyqty. Aıta ketken jón, «TMD Arýy» baıqaýy Qazaqstanda alǵash ret uıymdastyrylyp otyr. Ádil qazylardyń sheshimi boıynsha Vıktorııa Volgına (Reseı) úshinshi orynǵa ıe boldy. Ekinshi oryndy - Romella Tamarıan (Armenııa) enshilese, birinshi orynda - Ásem Esengeldına (Qazaqstan).
Al «TMD Arýy - 2018» Halyqaralyq baıqaýynyń altyn táji men Gran-prıin Tatıana Akýlenko (Ýkraına) jeńip aldy. Budan bólek, arnaıy atalymdar da boldy. Baıqaýdyń syıaqy qory - 10 myń eýro.
