Al Máshhúr Júsiptiń 160 jyldyǵyna arnalǵan negizgi mádenı-rýhanı is-sharalar ǵulamanyń kesene kesheninde, kıiz úıler qurylǵan etnoaýylda jáne dala sahnasynda uıymdastyryldy. Mereıtoıǵa kelgen ǵulamanyń urpaqtary, óńir jurtshylyǵy Jańajoldaǵy Eskeldi shatqalyndaǵy kesenesine kelip, Quran baǵyshtap, duǵa oqydy. Kesene elimizdiń «Qasıetti rýhanı qundylyqtary» baǵdarlamasy boıynsha respýblıkalyq kıeli oryndar tizbesine engen.
Kesene janyndaǵy memorıaldyq mýzeıde saqtalǵan jeke zattarymen, kóptegen kóne muralarymen tanysty. Keıbir ǵylymı materıaldar urpaqtary Qýandyq Júsipov aǵamyzdyń, Nartaı, Laýra, Estaı Júsipovterdiń jeke arhıvterinde de bar kórinedi.
Baıanaýyl aýdanynyń ákimdiginiń habarlaýynsha, jyl basynan beri óńirdegi kitaphana, mýzeılerde Máshhúr babamyzdyń mereıtoıyna oraı kóptegen rýhanı-mádenı sharalar ótkizilgen. Oblys ortalyǵyndaǵy Buqar jyraý atyndaǵy ádebıet jáne óner mýzeıinde «Ǵulama taǵylymy» atty kórme uıymdastyryldy.
Kórmege Almatydaǵy ortalyq ǵylymı kitaphana qorynda saqtalǵan jáne buǵan deıin jergilikti mýzeılerine qoıylmaǵan qoljazbalary, eski kitaptary jáne qazaq zııalylarymen jazysqan hattarynyń túpnusqalary, tirliginde paıdalanǵan Quran kitaby, qundy jádigerler qoıyldy. Mýzeı qyzmetkerleri Almaty kitaphanasynda saqtalyp kelgen qoljazbalarynyń sıfrlyq formattaǵy nusqasyn alyp qalǵan-dy.
Endi mine, mereıtoılyq shara barysynda ǵulamanyń 20 tomdyq shyǵarmalar jınaǵynyń sıfrlyq formatqa kóshirilgen nusqasynyń tusaýkeseri ótti. Ulttyq ǵylym akademııasynyń qorynan Máshhúr Júsiptiń qujattary jetkizildi. Respýblıkalyq «Mádenıet» jýrnaly óziniń tutas bir nómirin Máshhúr Júsipke arnapty.
Toıǵa arnaıy kelgen oblys ákimi Bolat Baqaýov tarıhshy ádebıetshilermen, Máshhúrtanýshylarmen, ǵulamanyń shyǵarmashylyǵyn zertteýshilermen kezdesti.
Eskeldi shatqalynda aıtys aqyndary eki kún boıy aıtysty. Sóz jarystyń alǵashqy aınalymy Jańajol aýylynyń mádenıet úıinde ótse, ekinshi kúni keseneniń qasynda jalǵasty. Kesene janyndaǵy Jańajol aýylynda turatyn Tilek Jumkenuly aıtys júldegeri atandy. Bul da bir yrym eterlik belgi.
Toı sońy etnoaýyl sahnasyndaǵy respýblıkalyq «Kóne ǵasyr kúmbiri» atty jyrshy, termeshiler saıysyna jalǵasty. At báıgesi de qyzdy. Ulylar mereıtoılarynyń qorytyndysy oblys ortalyǵynda 3-5 tamyz aralyǵynda ótetin «Uly Dala Eli» etnofestıvalinde de jalǵasyn tabady.
Farıda BYQAI
«Egemen Qazaqstan»
Pavlodar oblysy
Sýretti túsirgen: Valerıı Býgaev
