Jambyl oblysy ákimdiginiń belsendi qoldaýynyń nátıjesinde aýdanda «Qulan agroparki» atty ıntensıvti baý egilip, el ıgiligine paıdalanýǵa berildi. Jalpy quny 26 mıllıard teńgeni quraıtyn atalǵan joba aıasynda bolashaqta eki myńǵa jýyq qulandyqtar jumyspen qamtylatyn bolady. О́tken jyldan bastap aýdan ortalyǵy Qulan aýylynda merdiger «ARNO AGRO» jaýapkershiligi shekteýli seriktestigi 1000 gektar jerge jylyna 45 myń tonna ónim beretin údemeli jemis-jıdek baýyn otyrǵyzý jumystaryn bastap, kúz mezgilinde 200 gektar jerge shıe aǵashyn otyrǵyzǵan bolatyn.
– «Agropark Qulan» ıntensıvti baqsha alańyna shıe kóshetin otyrǵyzýdy ótken jyldyń qazan aıynda bastaǵan bolatynbyz. Dál qazirgi ýaqytta 100 gektar alqapqa Polsha memleketinen ákelingen «Lıýbskaıa» tuqymdy 166 myń túp shıe otyrǵyzyldy. Kóshetke barlyǵy 620 mıllıon teńge jumsaldy. Aýdanda baý-baqshany salýǵa tolyqtaı jaǵdaı jasalǵan, – deıdi «ARNO AGRO» jaýapkershiligi shekteýli seriktestiginiń bas dırektory Maqsat Qýanyshuly.
Búgingi tańda «Agropark Qulan» ıntensıvti baýynda 50-ge tarta jumysshy jumys isteıdi. Al 2020 jylǵa deıin aýdanda 600 gektar jerge alma, 200 gektar jerge jańǵaq jáne 100 gektar jerge júzim egý josparlanyp otyr. Aýdan ákimdiginiń málimetinshe, eger joba tolyqtaı júzege asqan jaǵdaıda eki myń adam jumyspen qamtylatyn bolady.
Qazirgi kezde T.Rysqulov aýdany myńdaǵan gektar jerge kóshet otyrǵyzý jumystaryn qarqyndy qolǵa alýda. Máselen Tereńózek aýylynan 188 gektar jerge «KazAlma» jaýapkershiligi shekteýli seriktestigi ıntensıvti alma baǵyn otyrǵyzý jumystaryn bastap ketti. Keleshekte shaǵyn aýyl aımaǵynda alma ósirilip, onyń jaqsylyǵyn halyq kóretin bolady.
– Satyp alynǵan shıe kóshetterine búginde tamshylatyp sýarý ádisi qoldanylýda. Bul maqsatqa nesıelik qarjylandyrý esebinen 386 mıllıon teńge jumsaldy. Polsha tálimbaǵynan 139 myń 944 dana kóshet jáne «SolDrip» brendiniń tamshylatyp sýarý quraly alyndy. Jobany júzege asyrýǵa Qulan aýylsharýashylyǵy kolledji óz úlesterin qosyp otyr. Atalǵan joba «Qulan agroparki» ıntensıvti baýynyń alǵashqy nysany, – deıdi T.Rysqulov aýdanynyń ákimi Asqar Qyryqbaev.
Sonymen qatar aǵymdaǵy jyly aýdanda 40 gektar alqapqa ıntensıvti alma baǵyn otyrǵyzý josparlanyp otyr eken. Búgingi tańda tartylǵan ınvestısııa kólemi 1,2 mıllıard teńgeni quraǵan. Bul da Jambyl óńiriniń ekonomıkasy úshin mańyzdy strategııalyq qadam, aımaqta órleýdiń jańa kezeńiniń bastaýy ári otandyq ónimdi óndirýge degen tyń qadam bolmaq. Sondaı-aq agrarlyq aýdannyń turǵyndary úshin de bul bastama nátıjeli eńbektiń bastaýy bolyp otyr. Bolashaqta Qulan jeriniń qalyń ormanǵa aınalǵanyn kóretin kún alys emes...
Hamıt ESAMAN,
«Egemen Qazaqstan»
Jambyl oblysy
