Buǵan deıin zeınetaqymen qamsyzdandyrý zańyna engizilgen jańa ózgerister boıynsha qazaqstandyqtar páter nemese kólik syndy jeke múlikti satýdan túsken kirisiniń 10 prosentin Biryńǵaı jınaqtaýshy zeınetaqy qoryna aýdarý kerektigi týraly jalǵan aqparat taraǵan bolatyn. Osy máseleniń mán-jaıyn túsindirgen S. Jaqypova taraǵan habardyń negizsiz ekenin jetkizdi.
− Jańadan ózgerister engizilgen zeınetaqy týraly zań qoǵamda qyzý talqylanyp jatyr. Sonyń ishinde azamattyq-quqyqtyq shart boıynsha jeke tulǵalardyń mindetti zeınetaqy jarnalaryn aýdarýyna qatysty birqatar suraq týdy. Osy rette Eńbek jáne halyqty áleýmettik qorǵaý mınıstrligi ýaqtyly túsinikteme bermedi, zańǵa táýeldi aktiler nege ýaqytynda qabyldanbaǵan degen másele týyndap otyr. Mınıstrlik nege túsinikteme bermegeni jaıynda aıtatyn bolsam, bul másele meniń quzyretimde. Men eńbek demalysynda bolýyma baılanysty bul máselege jeksenbi kúni ǵana tıisti túsinikteme bere aldym, – dedi vıse-mınıstr.
Onyń aıtýynsha, zańǵa táýeldi aktilerdiń der kezinde qabyldanbaýyna qatysty Úkimettiń reglamentine sáıkes, quzyrly organ zańnamalyq akti qabyldanǵan kúnnen bastap eki aı ishinde barlyq zańǵa táýeldi aktilerdi, eger bul buıryq bolsa, Ádilet mınıstrligine, qaýly bolsa, Úkimet qaraýyna engizýi kerek.
− Atalǵan zań 2 shildede qabyldansa, sáıkesinshe, 2 qyrkúıekte merzim aıaqtalady. Iаǵnı bul jerde eshqandaı da keshigý, ýaqyt sozý degen másele týyndap otyrǵan joq, – dedi S.Jaqypova.
Sonymen qatar vıse-mınıstr páter men kólik sekildi jeke múlikti satý kezinde zeınetaqy jarnasyn tóleý mindettemesi jaıynda da túsinikteme berdi.
− Mınıstrlik árkez dıalogke ashyq. Qoǵamda talqylanyp jatqan kez kelgen máselege qatysty biz pikirimizdi, túsiniktememizdi berýge daıynbyz. Sol sebepti men qoǵamda týyndaǵan máselelerdi durys paıymdap, durys túsindirýge shaqyramyn. Qazir áleýmettik jelilerde adamdar páter men kólik satylymynan zeınetaqy jarnasy ustalatynyn jazyp jatyr. Bul aıtylǵandar shyndyqqa janaspaıdy. Taǵy da aıtamyn, tabystan zeınetaqy jarnasy ustalmaıdy. Zeınetaqy jarnasy, eger siz qyzmet kórsetý nemese jumystardy oryndaý týraly kelisimshart boıynsha tabys tapqan bolsańyz ǵana ustalady, – dedi S.Jaqypova.
Mınıstrlik ókiliniń málimdeýinshe, qazirgi ýaqytta kóptegen jumys berýshiler men jeke tulǵalar mindetti tólemderden «qashyp», kelisimsharttar jasap, zeınetaqy jarnalaryn tólemeıtinin, eshkim óziniń zeınetaqymen qamsyzdandyrylýy jaıly tolǵanbaıtynyn aıtty. Atalǵan zań jobasy qoǵamda oryn alǵan osyndaı olqylyqtardyń ornyn toltyrýǵa baǵyttalyp otyr. Buǵan deıin kelisimshart boıynsha jumys isteıtin tulǵalardyń zeınetaqy qorlaryna qarajat aýdarylmaıtyn bolsa, endi kórsetilgen qyzmet túrinen 10 prosent BJZQ-ǵa aýdarylyp otyrady. Jańa zań boıynsha Qarjy mınıstrligine qarasty Kirister komıteti atalǵan sharttardyń qatań qadaǵalanýyn ýaqtyly tekserip otyrmaq. Al kelisimshart boıynsha zeınetaqy qoryna qarajat aýdarylmaǵan jaǵdaıda ákimshilik quqyq buzýshylyq kodeksiniń 44-shi, 91-shi babyna sáıkes, jeke tulǵa zeınetaqy qoryna ýaqtyly ıa tolyq jarnany aýdarmaǵany úshin atalǵan somadan 10 prosent aıyppul alynady.
Buǵan qosa, jańa zań jobasynda birinshi toptaǵy múgedek balalarǵa kútim jasaýshylarǵa arnalǵan jańa járdemaqy engizý normalary bekitilgen bolatyn. Atalǵan zań bıyl 2 shilde kúni kúshine endi, qazir eldegi 10 myńǵa jýyq otbasy atalǵan járdemaqyny alyp otyr.
Erkejan AITQAZY,
«Egemen Qazaqstan»
