Sanaly ǵumyryn Sarytoǵaı aýylynda shaǵyn ǵana mádenıet úıiniń meńgerýshisi bolyp atqarǵan Kósherǵalı Makarov Qazaqstannyń batys óńirindegi jyrshylyq mektebin jańǵyrtýǵa úles qosqan úlken ónerpaz edi. Tabıǵı talantynyń arqasynda alaqandaı aýyldan shyqqan ónerpazdyń esimi Qazaqstannan tys jerlerge de jetti. 1980 jyly Muhıt Meráliulynyń 140 jyldyǵyna arnalǵan ánshiler baıqaýynyń, 1988 jyly Almaty qalasyndaǵy respýblıkalyq jyrshy-termeshiler baıqaýynyń jeńimpazy bolǵan Kósherǵalı jyraý 1988 jyly Baký qalasyndaǵy dúnıejúzilik jyrshylar baıqaýynyń, 1989 jyly Túrki halyqtary dastanshylarynyń halyqaralyq óner festıvaliniń laýreaty atanǵan edi. 2001 jyly Qyzylorda qalasyndaǵy «Ǵasyrlar úni» jyrshylardyń «Jıenbaı jyraý» atyndaǵy baıqaýynyń júldegeri, 2005 jyly Mańǵystaý qalasyndaǵy «Shotan batyr» jyrshylar baıqaýynyń laýreaty boldy. 2005 jyly Mádenıet, aqparat jáne sport mınıstrligi men Mádenıet pen ónerdi qoldaýdyń memlekettik qorynyń «Mádenıet qaıratkeri» qurmet belgisimen marapattaldy.
1997 jyly ońtaılandyrý tusynda Taıpaq aýdany tarap, jańadan paıda bolǵan Aqjaıyq aýdanynyń ortalyǵy Chapaev selosyn «qazaqylandyrýǵa» kelgen toptyń ishinde osy Kósherǵalı aǵamyz da boldy. Chapaevta jyraýlar mektebin ashyp, talaı báıgede top jarǵan shákirt te tárbıelep úlgerdi. Tanymal jyrshy 2017 jyly 66 jasynda ómirden ótken edi.
Aýyldasyn eske alýǵa sarytoǵaılyqtar jaqsy ázirlenipti. Keshte Kósherǵalı Makarovtyń shákirtteri Suńǵat Janaev, Gúljamal Qaıbalıeva, Danııar Eleýov, Satybaldy Súıenuly, Qaırat Shabdanuly jáne basqalary aýyl sahnasynan áýezdi án, tókpe jyr shyrqap, kórermendi tánti etti. Jyrshynyń birge ósken joldasy Orynbasar Jáńgirov, qurdasy, Qazaqstan Jýrnalıster odaǵynyń múshesi Tiles Jazyqbaı, Sarytoǵaı aýyldyq okrýginiń ákimi Abzal Járdemuly, kórshiles Atyraý oblysy, Inder aýdany Mádenıet úıiniń án-terme úıirmesiniń jetekshisi Erkin Áýbákirov, Sarytoǵaı Mádenıet úıiniń dırektory Ardaq Shabdanqyzy, Sarman aýylynyń turǵyny, zeınetker Amangeldi Qalıtalıev, jeztańdaı jyraý Qaırat Bımanov, kórshiles Bazarsholan aýyldyq okrýginiń ákimi Erlan Bazarbaıuly, aýdandyq máslıhat depýtaty Qanapııa Taspaı jáne basqalary jyrshy týraly estelikterin ortaǵa saldy.
Osy keshte Tiles Jazyqbaı Kósherǵalı Makarovtyń ózi kóp jyl qyzmet etken Sarytoǵaı Mádenıet úıine jyraýdyń esimin berýdi usynyp, ony barlyǵy biraýyzdan qoldady.
Keshtiń mándi de maǵynaly ótýine belgili aqyn Saǵyntaı Bısenǵalıev, aýdandyq mádenı-demalys ortalyǵynyń dırektory Erlan Habıbýllın erekshe úles qosty. Kesh sońynda jyraýdyń jary Jumazııa, uly Altynbek jınalǵan jurtqa ystyq iltıpaty úshin alǵys aıtty.
Qazbek QUTTYMURATULY,
«Egemen Qazaqstan»
Batys Qazaqstan oblysy
