«Egemen Qazaqstannyń» arnaıy jobasy: Jasampazdyq jemisteri
Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi. «Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady. Tómende Qaraǵandy oblysynyń Qarqaraly aýdanynan fotoreportaj berilip otyr.
ATYŃNAN AINALAIYN, QARQARALY!
Qarqaraly aty atalǵanda aldymen tabıǵaty kórkem ólke kóz aldyǵa kele qalatyny aıan. Sondaılyq jer sulýlyǵyna saı ótkendegi de, búgingi de tarıhy asa aıshyqty aımaq sondaı-aq, halqymyzdyń uly tulǵalaryn dúnıege ákelýshi kıeli topyraq turǵysynda da elge ortaq maqtanysh. Qaz daýysty Qazybek bıdeı aqylman, Qalıbekteı qaıtalanbas óner ıesi, Qasymdaı asqar aqyn kindik qany tamǵan, qaradan shyqqan handaı Qunanbaı qajy, uly Abaı, ult kósemi Ahmet izi qalǵan ólke shejiresiniń ár paraǵy bederli syrǵa toly. Onyń jańa betteri táýelsizdik tańy atqannan beride odan saıyn jarqyn.
Keńestik kezeń basynda qaıta qurylǵanyna 80 jyldan asýyn bylaı qoıǵanda aýdan tarıhy tamyry alys ýaqyttar qoınaýymen jalǵasyp jatyr. Reseı ımperııasynyń áskerı bekinisi retinde irgesi qalanǵan Qarqaralynyń shahar atanǵanyna bir jarym ǵasyrdan asyp, ol aımaqtaǵy alǵashqy ári qart qala bolyp qalýymen mártebeli. Al ataýynan ańǵarylatyndaı Kent taýynyń baýraıynda odan da áridegi ejelgi kent izderi kózge túsedi. Qasym Amanjolov aýlynyń mańaıynan tabylǵan ertedegi saq dáýiri kósemderiniń altyn zattarmen áshekeılengen qorymy ólke ótkendegisiniń juldyzdy dáýiriniń elesi.
Bul qazaq dalasyndaǵy naryqtyq ekonomıkanyń ushqyny Qoıandy jármeńkesi dúbirlegen, Alash arystary el azattyǵy jolynda tý kóterip, patsha ókimetinen ulttyq teńdik, azamattyq bostandyq surap, 16 myń adam qol qoıǵan áıgili Qarqaraly petısııasy qabyldanǵan jer.
Buǵan deıingi Egindibulaq, Taldy aýdandary quramyna qosylyp, aýmaǵy ulǵaıyp, halqy kóbeıgen kórikti óńir ómiri bul kúnde órkendi ózgerister men jaǵymdy jańarýlarmen jarasty. Quramyna 79 eldi-meken, 23 aýyldyq okrýg, 1 qala jáne 1 kent birikken aımaqta sharýashylyqtyń barlyq salasy damyp otyr. Egin men mal ósirýdiń qyr-syryna ábden qanyq jergilikti eńbekkerler tabysy jyldan-jylǵa mol. Berekeli istiń bel ortasyndaǵy «Arqa», «Appaz» sııaqty irgeli sharýa qojalyqtarynyń Qaıdar Býrabaev, Razaq Álındeı el ishine janashyr bilikti jetekshileri az emes. Ortaq ıgilikti ujym múshelerimen qyldaı bólisetin bul jandardyń jurtqa qamqorlyǵy is basyndaǵy azamattarǵa úlgi bolyp keledi. Osyndaı izgi nıet shýaǵy birlik pen baýyrmaldastyqty nyǵaıta túsýde. «Men úshin aýyldastarym kóńil-kúıiniń kóterińki bolýynan artyq qýanysh joq» dep sanaıtyn el aǵasy Qaıdar Býrabaev jolyn murat tutýshylar kóp. Bir-birin qoldaý, aǵaıynshyldyq qazaqy qasıet qonǵan bul jaqta.
Boı kóterýi kóbeıe túsken turǵyn úıler, mektepter, mádenı oshaqtar, aýrýhanalar qazir aýdannyń qaı jerindegi de úırenshikti kórinister. Qııan túkpirdegi aıadaı aýyldarǵa deıin joldar tartylyp, jaryq qosylyp zaman talǵamyna saı jaıly turmys daǵdyly jaǵdaıǵa aınalý ústinde.
О́nerkásiptiń birge jańǵyryp, jandanýy aýdan ál-qýaty kúsheıýine qosymsha myqty tirek. Indýstrııalyq-ınnovasııalyq damý baǵdarlamasy aıasynda óndiristi órletken Qaraǵaılydaǵy, Egindibulaqtaǵy kásiporyndar óńir tynysyna tyń lep estirýde. Olar jergilikti turǵyndar tilegine oraı áleýmettik nysandardy salýdan, jol, baılanys ınfraqurylymyn qalyptastyrýdan syrt qalmaıdy.
Sóz kezeginde aıta ketkende, qarqaralylyqtardyń táýelsizdik jyldaryndaǵy, sonyń ishinde mereıli mereke tusyndaǵy jetistikteri men jeńisterine myna fotosýretter aıǵaq. Iá, búgingi Qarqaraly osyndaı. Atalarymyz «Atyńnan aınalaıyn» dep qasterlegen qasıetti ólke qazir de sondaılyq súıispenshilikte. Uly perzenti Qasym aqyn «Sen qandaı baqytty ediń, keler urpaq. Qaraımyn kelbetińe men tańyrqap» dep jyrlaǵandaı, týǵan jerlerin jaınatyp, túletýshi býyn is-qyzmeti qyzyǵarlyq munda.
________________________________
Arnaıy betti daıyndaǵan «Egemen Qazaqstan» gazetiniń Qaraǵandy oblysy boıynsha menshikti tilshisi Aıqyn NESIPBAI.
