Elordadaǵy EKSPO qalashyǵyna qashan barsaq ta qyzyǵy esh taýsylǵan emes. Ortalyqtaǵy tańdaıqaqtyrar tańǵajaıyp týyndylarǵa talaı tamsanyp, ınnovasııanyń ıgiligine san márte súısinip qaıtqanbyz. Bul joly da EKSPO qalashyǵynda taǵy bir keremet is-sharanyń bastalǵanyn súıinshileýge asyqpyz. Bul – «Nur Álem» sferasynda ótip jatqan «Robottar baly».
Kelýshilerge árkez jańashyldyqty jarshylap, zamanaýı dúnıelerge kózaıym etýge beıim ortalyq atalǵan aıryqsha baldyń bastalýyna oraı buqaralyq aqparat ókilderin shaqyryp, baspasóz týryn ótkizdi.
«Robottar baly» roboshoýy – Amerıka, Eýropa, Ońtústik Koreıa jáne Japonııa robot-tehnıkasynyń sońǵy jetistikterin jáne zamanaýı robottar sletin usynady. Jas urpaqtyń ıntellektýaldy áleýetin damytý, jastar arasynda ınjenerlik mamandyqtardy nasıhattaý, elimizde robottyq tehnıkany damytýdy yntalandyrý jaıyn maqsat etken shara 7 tamyzda bastalyp, qyrkúıektiń 26-syna deıin jalǵaspaq. Kelýshiler nazaryn aýdaryp, salaǵa qyzyǵýshylyq oıatýdy kózdegen uıymdastyrýshylar balǵa qatysýshy robottardyń «jetistigin» meılinshe ashýǵa tyrysqan. Máselen, qoıylymnyń basty hedlaıneri aǵylshyndyq robot – gýmanoıd Tespıan «segiz qyrly, bir syrly», «besaspap» ekendigin tanytty. Ol sóıleıdi, ymdardy kóshiredi, án aıtady, tipti bı bılep, kúledi, jylaıdy. Kerek deseńiz, Shekspırdiń shyǵarmalaryn da oqyp beretini aıtyldy. Sonyń arqasynda zamanaýı teatr qoıylymdarynda birneshe ret oınaǵan da eken. Jalpy, balǵa qatysýshy robottar qatary az emes, olardyń árbiriniń ereksheligi, jasalý tarıhy, mazmuny árqıly. Bastysy, elimizge kelgen erekshe robottar Astanamyzda áli biraz ýaqyt aıaldaıdy. Al ár robotpen jekeleı tanysamyz deýshilerge EKSPO kesheniniń esigi árdaıym ashyq. Iá, «jaqsyny kórmekke» degen...
Dınara BITIK,
«Egemen Qazaqstan»
