Rýhanı máselelerge den qoıýda

«Rýhanııat» partııasynyń atynan de­pýtattyqqa kandıdat, tanymal rejısser Erkin Raqyshev óziniń saılaýaldy úgit-nasıhatyn ózgeshe qadamnan bastady. Jýyr­da ǵana «Aısha» atty jeti serııaly jańa týyndysymen ulttyq kıno keńistigine jylt etken sáýle túsirgen rejısser Almaty qalasyndaǵy №1 balalar úıinde qaıyrymdylyq sharasyn ótkizdi. «Qazaqfılm» stýdııasymen birlesip túsirgen «Aısha» fılmi qarapaıym da qyzyqty sıýjet arqyly ulttyq qundy­lyqtardy qasterlep, kózdiń qarashyǵyndaı saqtaýǵa, óskeleń urpaq boıynda ulttyq-patrıottyq sezimdi qalyptastyryp, qorshaǵan ortany syılaýǵa, qoǵamǵa tıtteı de bolsa paıdaly úles qosýǵa úndeıdi. Osy partııadan depýtattyqqa kandıdat Qaırat Bodaýhan Jańaózen oqıǵasy boı­yn­sha qurylǵan Úkimettik komıssııa tóraǵasy О́mirzaq Shókeevke arnaǵan málimdeme jasady. Onda úmitker «...oqıǵaǵa kináli oral­mandar, sondyqtan olardy basqa ólkelerge kóshirý kerek...» dep málimdeýińiz memleket pen ulttyń abyroıyna úlken syn boldy dep esepteımiz. Kóshi-qon, oralmandar máselesi memlekettik strategııa retinde árkez el saıa­sa­tynan umyt qalǵan emes. Alaıda, atqarýshy bıliktiń qyrsyzdyǵy men oralmandardyń saıası, quqyqtyq shekteýligi kóp taýqymet­tiń der kezinde sheshilýine múmkindik bermedi, sol sebepten qoǵamdaǵy álsiz topqa oralmandardyń bir bóligi qosyldy. Sizdiń komıssııa tóraǵasy retinde Jańa­ózen oqıǵasyna oralmandardyń qatys­ty­lyǵyna qatysty obektıvti baǵa berýińizdi suraımyz», delingen málimdemede. Endi atalǵan partııanyń tuǵyrnamasyna qysqasha toqtalatyn bolsaq, onda rýhanııattyqtar el ekonomıkasyn kóterýdi, áleýmettik máselelerdi sheshýdi, bıik adamgershilikti jáne rýhanı jaǵynan tolysqan qoǵam qalyptastyrýdy ózderiniń basty baǵdarlary etip alǵan. Partııanyń kezekten tys ótken VIII sezinde partııa tóraǵasy Serikjan Mámbetalın «Rýhanııat» partııa­synyń Jarǵysyna ózgeris engizilgenin aıta kelip, partııa usynǵan kandıdattardyń barlyǵy derlik joǵary bilimdi, saıasattan habary bar, kózi ashyq adamdar ekenin alǵa tartqan bolatyn. Bul sózdiń shyndyqqa sáıkesetinine eshkim daý aıta qoımas. Qanat ESKENDIR. ALMATY.