Semeı óńiriniń týmasy otandyq fýtbol tarıhynda ózindik qoltańba qaldyrǵany daýsyz. Ol 1997-2018 jyldar aralyǵynda «Elimaı» (Semeı), «Ertis» (Pavlodar), Rostselmash (Dondaǵy Rostov), «Jeńis» (Astana), «Qaırat» (Almaty), «Aqtóbe» (Aqtóbe), «Rızespor» (Túrkııa), «Ordabasy» (Shymkent) klýbtarynda óner kórsetti. О́zi qorǵaýshy bola tura talaı matchtarda mańyzdy goldar soqty.
Qazaqstannyń ulttyq quramasy sapynda Smaqov 76 ret jasyl alańǵa shyqty. El birinshiliginde 6 ret el chempıondyq ataqqa qol jetkizip, taǵy 5 ret júldeger sanatyna qosyldy. 2004, 2007, 2008 jáne 2009 jyldary Qazaqstannyń eń úzdik fýtbolshysy atandy. 2013 jyly Túrkııanyń birinshi lıgasynyń eń úzdik qorǵaýshysy degen mártebeli ataqty ıelendi. Mine, endi sol 39 jastaǵy serke oıynshy úlken sportpen qosh aıtysýǵa bel býdy.
Aqtóbede ótetin Samat Smaqovtyń qoshtasý matchynda Rýslan Baltıev, Nurbol Jumasqalıev, Álibek Bóleshev, Murat Tileshev, Andreı Mıroshnıchenko, Emıl Kenjesarıev, Andreı Fınonchenko, Malık Mane, Tıtı Essomba, Evgenıı Lovchev, Andreı Sıdelnıkov, Andreı Bogomolov, Marat Haırýllın, Jasur Narzyqulov, Aleksandr Mıtrofanov, Andreı Lavrık, Qaırat Áshirbekov, Andreı Morev, Sergeı Strýkov, Vıtalıı Kısak, Dmıtrıı Iýrıst jáne taǵy basqa tanymal teńbil dop sheberleri jasyl alańǵa shyǵady dep kútilýde.
Atalmysh básekeniń bılet quny 300 teńgeni quraıdy. Bul oıynnan túsken qarajat túgeldeı qaıyrymdylyq sharalaryna jumsalady.
Ǵalym SÚLEIMEN,
«Egemen Qazaqstan»
