Úgit poıyzy jolǵa shyqty

Keshe Qaraǵandy qalasynyń temir jol vokzalynan Qazaqstan Kommýnıstik halyq­tyq partııasynyń saılaýaldy jumystaryn júrgizetin toptarynan quralǵan úgit poıy­zy óńirdiń eldi mekenderin aralaýǵa at­tan­dy. Úgitshilerdiń negizgi quramy QKHP ob­lystyq fılıalynyń belsendilerinen ja­saqtalǵan. Eki aptadan artyq merzimge josparlan­ǵan úgit poıyzynyń sapary Qaraǵandy oblysynyń aýyldyq aýdandary men Temirtaý, Saran, Abaı, Shahtınsk sııaqty qala­larynda jalǵaspaq. Úgit brıgadasynyń jetekshisi Tımýr Saıfýllınniń aıtýynsha, saparǵa shyqqan úgit poıyzynyń basty maqsaty – jer-jerdegi turǵyndarmen tikeleı júzdesý. Bir jaǵynan, osy kezdesýler barysynda QKHP-nyń saılaýaldy tuǵyr­na­masymen tanystyryp, jan-jaqty úgit jumystaryn ótkizý bolsa, ekinshi jaǵynan, shalǵaı eldi mekenderdegi turǵyndardyń aryz-shaǵymyn tyńdap, depýtattyqtan úmit­kerlerge aıtatyn amanattaryn qa­byldaý. QKHP oblystyq saılaýaldy shtabynyń jetekshisi Aleksandr Zevahın bul úgit poıyzyn daıyndaýǵa múgedek balalary bar analardyń múddesin qorǵaıtyn «Qamqor» qoǵamdyq birlestiginiń erekshe belsendilik tanytqanyn atap kórsetti. Onyń aıtýyn­sha, Qaraǵandy oblysynda kommýnısterdiń saılaýaldy úgit-nasıhat júrgizý jumysy erekshe belsendilikpen bastalǵan. Úgit jumystary bastaý alǵan kezeńnen beri QKHP quramynan usynǵan úmitkerlerdiń saıası kózqarasyn aıqyndaıtyn birneshe aqparattyq bılbordtar ilingen. Bul rette jergilikti bılik organdary kommýnısterge eshqandaı kedergi keltirip otyrmaǵandyǵyn da oblystyq shtab jetekshisi atap aıtty. – Biz úı-úılerdi aralap, QKHP úmit­ker­leriniń baǵdarlamalarymen tanystyryp júrmiz. Turǵyndar bizdi jyly qarsy alýda. Qazirdiń ózinde men qaraǵan­dylyq­tardyń kópshiligi bizdiń partııaǵa jyly qabaq tanytyp otyrǵandyǵyna kýá bolyp júrmin. Aldaǵy ýaqytta biz jumysy­myzdy osy qarqynmen qyzý jalǵastyra bermekpiz, – deıdi QKHP-nyń jas úgitshisi Arman Lezbaev óz oıymen bólisip. Qazaqstan Kommýnıstik halyqtyq partııasy saılaýaldy úgit-nasıhat jumys­ta­ryn barlyq óńirlerde qyzý júrgizýde. Oǵan partııa tarapynan belgilengen úgit­shi­lerdiń belsendi qımyly aıǵaq bolǵandaı. Jylqybaı JAǴYPARULY.