Dúısenbi kúni Koreıa Halyq-Demokratııalyq Respýblıkasynyń (KHDR) memlekettik teledıdary Soltústik Koreıa respýblıkasynyń lıderi Kım Chen Irdiń ómirden ozǵanyn habarlady. Reıter aqparat agenttiginiń taratqan aqparattary boıynsha, KHDR basshysy 17 jeltoqsanda júrek talmasynan qaıtys bolǵan.
Kım Chen Ir Soltústik Koreıany 1994 jyldan úzilissiz 17 jyl basqardy. Keıbir aqparat kózderine qaraǵanda, onyń kenetten qaıtys bolýy 2008 jyly alǵan júrek talmasynyń saldary bolsa kerek. Koreıa kósemi 70 jasqa birneshe aıdaı ýaqyt qalǵanda kóz jumyp otyr. Sheteldik BAQ-tar onyń sol kezden bastap qolyndaǵy bıligin kishi uly Kım Chon Ynǵa birtindep bere bastaǵanyn aıtady. Qazirgi kezde KHDR bıligin Kım Chon Ynǵa tapsyrý úderisi júrip jatyr. Al Kım Chen Irdi jerleý rásimi 28 jeltoqsanda Phenıanda ótedi.
TUTQYNDAÝǴA ORDER BERDI
Irak soty eldiń vıse-prezıdenti Tarık ál-Hashemıdi tutqyndaýǵa order berdi. Frans-press agenttiginiń habarlaýynsha, ol antıterrorlyq zańnamalardy buzǵan kórinedi. Irak ishki ister mınıstriniń memlekettik teledıdarǵa bergen suhbatynda keltirilgen derekter boıynsha, Tarık ál-Hashemıdiń kúzetshileri terrorlyq áreketter jasaýdy josparlaǵan. Vıse-prezıdenttiń ózi olarǵa qoldaý kórsetken jáne qarjymen qamtamasyz etken sııaqty. Al vıse-prezıdenttiń eki kúzetshisi Tarık ál-Hashemıdiń ushaǵyna mingeli jatqanda tutqynǵa alynǵan. Birqatar BAQ-tar vıse-prezıdenttiń Kúrd avtonomııasy aýmaǵyna ushyp shyǵýy aldyn ala josparlanǵanyn jazady.KANDIDAT RETINDE TIRKEDI
Reseı Federasııasynyń Ortalyq saılaý komıssııasy Premer-mınıstr Vladımır Pýtındi prezıdenttikke kandıdat retinde tirkedi. RIA Novostı agenttiginiń habarlaýynsha, ol resmı túrde tirkelgen birinshi kandıdat bolyp tabylady. Vladımır Pýtın prezıdenttikke kandıdattyqqa ózi jetekshilik etetin «Edınaıa Rossııa» partııasynan usynylyp otyr. Ortalyq saılaý komıssııasyna tirkeýden ótý úshin «Spravedlıvaıa Rossııa» partııasynyń basshysy Sergeı Mıronov, RLDP kósemi Vladımır Jırınovskıı jáne Reseı kommýnısteriniń jetekshisi Gennadıı Zıýganov qujattaryn tapsyrǵan. Saılaý komıssııasy, sondaı-aq bıznesmen Mıhaıl Prohorovtyń, Vladıvostoktyń eks-meri Vıktor Cherepkovtyń, Irkýtsk oblysynyń gýbernatory Dmıtrıı Mezensevtiń de qujattaryn qabyldaǵan.OPAT BOLǴANDAR AITARLYQTAI
«Ýoshı» atalatyn taıfýn Fılıppın jurtshylyǵyn joıqyn apatqa soqtyryp otyr. Reıter agenttiginiń aqparattaryna qaraǵanda, sý basý men jer kóshýiniń saldarynan keshegi kúnge deıin 957 adam qurban bolyp, taǵy 50-ge jýyq turǵyn habar-osharsyz ketken. Fılıppın bıliginiń habarlaýynsha, ótken aptanyń sońyna qaraı bastalǵan tabıǵat apatynan eldiń ońtústiginde ornalasqan Kagaıan-de-Oro jáne Lıgan qalalarynyń mańyndaǵy eldi mekender kóp zardap shekken. Atalǵan qalalardyń basshylyǵy juqpaly aýrýlardyń beleń almaýy úshin opat bolǵandardy tezdetip jerleý múmkindigin qarastyryp jatyr.30 TRLN. IEN ShYǴYNDAIDY
Japonııa bıligi valıýtalyq qor kólemin ulǵaıtý maqsatynda 30 trıllıon ıen (385 mıllıard dollar) bólý týraly sheshim qabyldady. AǴR agenttiginiń taratqan aqparattary boıynsha, úkimettiń valıýta ıntervensııasyna jumsaıtyn shyǵynynyń kólemi 195 trıllıon ıenge deıin ósip otyr. Qor kólemin ulǵaıtý el tarıhynda osymen ekinshi ret qaıtalanǵan kórinedi. Buǵan deıin valıýtalyq qor ıntervensııasy 2003-2004 jyldyń kókteminde jasalyp, Japonııa ıen baǵamyn qoldaý úshin sharalar da qabyldaǵan-tyn. Bul jóninde el bıligi «úlken segizdik» elderimen kelisken de syńaıly.161 DANA ATYS QARÝY ALYNDY
Vashıngtonda keń aýqymda júzege asyrylǵan operasııanyń nátıjesinde qarý-jaraq pen esirtki zattaryn saqtady jáne satty degen kúdikpen 70 adam tutqyndaldy. Jergilikti quqyq qorǵaý organdarynyń málimdeýinshe, olardan alynǵan qarý túrleri men esirtki zattarynyń jalpy quny 7,1 mıllıon dollardan asady. Qylmystyq toptardan 9,6 kılo kokaın men geroın, sondaı-aq 161 dana atys qarýy alynǵan. Operasııaǵa aralarynda Federaldyq tergeý bıýrosynyń qyzmetkerleri bar birqatar federaldyq vedomstvolar da qatysqan. Al operasııa 2010 jyldyń qarashasynan bastap qolǵa alynǵan eken.Qysqa qaıyryp aıtqanda:
• Keshe Qytaı polısııasy Gýandýn provınsııasynyń ońtústigindegi Haımen qalasynyń úkimettik keńsesin kúshpen basyp almaq bolǵan sherýshilerdi qýyp taratty. Olardyń talaby – aýany lastaıtyn elektr stansasyn jabý.
• Ońtústik Koreıa Kım Chen Irdiń qaıtys bolýyna baılanysty Soltústik Koreıa basshylyǵyna kóńil aıtty. Sonymen qatar, Seýl Phenıanǵa qaraly jıynǵa qatysý úshin resmı delegasııa jiberetinin de málimdedi.
• Egıpet joǵary áskerı keńesiniń ókili, general Adel Imar el parlamentiniń ǵımaratyn órtemek bolǵandardyń anyqtalǵanyn jarııa etti.
• AQSh kongresi 2014 jyly Mınskide hokkeıden ótetin álem chempıonatyna qatysýdan bas tartýǵa shaqyrǵan zań qabyldaýy múmkin.
Internet materıaldary negizinde ázirlendi.
