Qazaqstandyqtar Memleket basshysynyń Táýelsizdiktiń 20 jyldyǵyna arnalǵan saltanatty jınalysta sóılegen sózine ún qosady
_____________________
BILEKTI – BIRDI, BILIMDI – MYŃDY JYǴADY
Qazaqstan Respýblıkasynyń Prezıdenti – Ult Kóshbasshysy N.Á.Nazarbaevtyń el Táýelsizdiginiń 20 jyldyǵyna arnalǵan saltanatty jıynda sóılegen sózin gazetten tolqymaı, tebirenbeı oqý múmkin emes. О́ıtkeni, onda el halqy basynan keshken tar jol, taıǵaq keshý men sol el azamattary ańsaǵan arman-maqsattyń bári: táýelsizdik tarıhy da, táýelsizdiktiń tolaǵaı tabysy da, tórt qubylasy túgel sol táýelsiz eldiń endigi onjyldyqtardaǵy baǵyty men baǵdarynyń túzý túzilgen dańǵyly da egjeı-tegjeı baıandalǵan.
«О́tkinshi mynaý dúnıede, ótpeli bári, ótpeli», dep aqyn Esenqul Jaqypbek jyrlaǵandaı, men Táýelsizdiktiń toqsanynshy jyldaryndaǵy qıyndyqtardy óz basymnan ótkergen adammyn. Odaq ydyrap, keńestik oqý baǵdarlamasy adyra qalyp, qaı oqý men qaı ǵylym-bilim úlgisin ustyn qylaryn bilmeı abdyraǵan áriptesterim de este. Maǵan Jambyl polıtehnıkalyq kolledjin basqarýdy tapsyrǵan kezde, shynymdy aıtasam, bir kezderi myńdaǵan stýdent oqıtyn irgeli oqý ornynda nebary 240 stýdent qana qalypty. Al olarǵa 18 oqytýshy bar bolǵany 3 mamandyq boıynsha bilim beredi eken. Jylýǵa, jaryqqa, sýǵa degendeı jáne basqa da kommýnaldyq qaryzdary bastarynan asqandyqtan, kolledjdiń negizgi korpýsy jabylyp, at tóbelindeı stýdentter men oqytýshylar jataqhananyń 4-qabatyna baryp bas saýǵalapty. Maǵan sol tusta endi bolmasa kolledjdiń ózi de jabylǵandaı eken-aý degen oı kelgen.
«Otyzda orda buzbasań, qyryqta qyr aspaısyń», degen. Jastyq jigermen táýekel dep iske kirisip kettim. «Kirisip kettim» deý aıtqanǵa ǵana ońaı, áıtpese, «turymtaı tusymen, balapan basymen» bolǵan ýaqytta zııaly qaýym da, qarapaıym halyq ta nesibesin jabaıy saýdadan izdep, qashannan óner-bilimge qushtar halqymyzdyń «oqý», «bilim» degen ardaǵy adyra qalǵanyn kórip, qatty qınaldym. Biraq Elbasynyń: «Munyń bári ýaqytsha qıyndyq», degen sózi namysymdy qamshylap, táı-táı basqan aıaǵy sý tógilmes jorǵadaı endi taıpalyp kele jatqan táýelsiz elimizdiń eńseli erteńinen úmit úzbeı, oqý ornyndaǵy uıymdastyrý jumysyn jalyqpaı jalǵastyra berdim.
Izdenis túbi – injý eken, birte-birte qıyndyqtar artta qala bastady. Qazaq-german jobasyna qatysyp, kolledj qoryna ájeptáýir qarjy túsirdik. Bul kezde el-jurt ta es jıyp, kóshede kákir-shúkir satqan ata-analar balalaryn oqý oryndaryna qaıtadan baǵyttaı bastaǵan. Men kolledjdi qabyldap alǵan kezdegi 18 oqytýshynyń qatary az ǵana jyldyń ishinde 300-ge, al stýdentterdiń sany 3000-ǵa jetti. Olar kolledjden 27 mamandyq boıynsha bilim alyp shyǵatyn boldy.
Ýaqyt talaby bilim berý salasyndaǵy naryqtyq qatynastardy da úıretti. Sonyń nátıjesinde bir kezderi oblystyq SES-tiń sheshimimen jabylyp qalǵan negizgi korpýs stýdentterge qaıta esik ashty. Oqý orny túgeldeı jańa jıhazdarmen, kompıýterlermen jabdyqtaldy. Kúrdeli jóndeý jumystary júrgizildi. Bir kezde qańyrap turatyn aýdıtorııalar endi stýdentterge syımaıtyn boldy. Tipti, bir orynǵa ondaǵan úmitker talasatyn qýanyshty kúnge de qol jetkizdik.
Oılap otyrsam, búgin sonyń bári kórgen tústeı óte shyǵypty. «Egemen Qazaqstan» gazetinen Elbasynyń sózin oqyp otyryp, óz basymnan ótkergen oqıǵanyń bári kóz aldymnan kınohronıkadaı qaıta ótip jatty. Jambyl atamyzdyń atymen atalatyn irgeli oqý ornyn qıyn-qystaý kezde shańyraǵyn ortasyna túsirmeı, aman-esen basqa basshyǵa túp-túgel tapsyrǵanyma da shúkirshilik ettim.
Dana halqymyzda: «Bilekti – birdi, bilimdi – myńdy jyǵady» degen qanatty sóz bar. Sondyqtan men Elbasymyz Nursultan Nazarbaevtyń: «Qazaqstanda úzdik bilim berý, úzdik densaýlyq saqtaý, úzdik memlekettik basqarý, úzdik ádil sot bolýy tıis», degen sózine barsha qazaqstandyqtar bar bolmysymen, barlyq qajyr-qaıratymen atsalysady dep senemin.
Dúısenbek ÁBDIRAIYMOV, pedagogıka ǵylymdarynyń doktory, professor.
Jambyl oblysy.
