Qazir qytaılyq SMS (China National Machinery Imp. & Exp. Corp.) memlekettik kompanııasynyń «Allur Group» AQ-nyń kapıtal úlesine ıe bolý máselesi qarastyrylyp jatqany belgili. Arhımed Muhambetov atalǵan kompanııa jetekshisimen SMS-diń taıaý arada Allur Group quramyna kirý jospary týraly kelissózder júrgizdi. Istiń túbegeıli aıaqtalýy bıylǵy qazan aıyna josparlanyp otyr. Bul jóninde oblys ákiminiń baspasóz qyzmeti habarlady.
«Allur Group-diń» enshiles kompanııasy «Agromashholdıng KZ» AQ-nyń basshylyǵy qytaılyq YTO Group Corporation jetekshilerimen júzdesti. Kompanııa Qostanaı qalasynda TMD naryǵyna baǵyttalǵan jańa traktor zaýytyn salýǵa nıetti ekenin bildirdi. YTO Group Corporation – negizi 1955 jyly qalanǵan «Sinomach» korporasııasynyń enshiles kásiporyny. Ol QHR jáne álemdegi mashına qurastyrý, traktorlar óndirisi, aýylsharýashylyǵy men qurylys tehnıkalaryn shyǵaratyn eń iri kompanııanyń biri. Osy jyldyń 6-9 shildesi aralyǵynda Beıjiń qalasynda ótken qazaq-qytaı iskerlik keńesi kezinde «Agromashholdıng KZ» AQ Qazaqstanda «YTO» traktorlaryn qurastyrý jóninde áriptestik memorandýmyna qol qoıǵan bolatyn. Kompanııa ókilderi osy másele jóninde taıaý arada Qazaqstanǵa kelip qaıtpaq.
Qytaılyq tarap oblysta mashına qurastyrý salasynan basqa jan-jaqty astyq óńdeý jobalary boıynsha da mol qyzyǵýshylyq tanytyp otyr.
Sonyń biri búginde qazaqstandyq «BioGrain» JShS men qytaılyq áriptes-kompanııalar Myande Group Co., Ltd. jáne Beijing Municipal Construction Group Co., Ltd. arasynda birlesken jobalar tóńireginde belsendi jumystar atqarylyp jatyr. Kompanııa basshylary jaqyn arada Qostanaıdaǵy Indýstrııalyq aımaqta júzege asatyn mega jobanyń quny 300 mln. AQSh dollary ekenin alǵa tartýda.
Kelesi joba Qazaqstanda óndiris kólemi jylyna 500 myń tonna bolatyn DN5 pentametılendıamın (neılon) óndirisin qolǵa alý jáne jylyna 2,3-2,5 mln. tonna bıdaı men júgeri óńdeýdi júzege asyratyn bolady. Jobanyń bastapqy quny 2-2,5 mlrd. AQSh dollaryna baǵalanyp otyr. Bul kelissózderge otandyq «QazAzot» AQ men qytaılyq Cathay Industrial Biotech Ltd jáne CITIC Construciton Co. Ltd. kompanııalary uıtqy bolýda. Aıta ketý kerek, CITIC (China International Trust and Investment Corporation), ıaǵnı Múlikti basqarý jónindegi Qytaı halyqaralyq ınvestısııalyq korporasııasy «aspan asty» elindegi birden bir iri ınvestısııalyq korporasııa bolyp sanalady.
Sondaı-aq Beıjińdegi kezdesý kezinde oblys basshylyǵy aımaqtyń ınvestısııalyq múmkindikteri, ekonomıkalyq áleýet jáne memlekettik qoldaýlar jóninde tanystyrylym jasady. Usynylatyn barlyq múmkindikter men ınvestısııalyq qolaıly klımatty eskergen qytaılyq tarap aldaǵy jobalardyń sátti júzege asyrylatynyna nıet tanytty.
Oblys ákimi Arhımed Muhambetov bastaǵan Qostanaılyq delegasııanyń Qytaıdaǵy jumys sapary apta sońyna deıin jalǵasady. Beıjińde SANY GROUP Co. Ltd., SINOTRUK Limited International jáne Hanteng Auto Co. Ltd. kompanııalarynyń basshylyǵymen kezdesýler josparlanǵan. Sondaı-aq qazaqstandyq tarap Anhoı provınsııasynyń Hefeı qalasynda teledıdar óndirisimen tanymal HKC Corporation Limited kompanııasynyń zaýytyna barady. Eske salsaq, HKC Corporation Limited kompanııasynyń ókilderi Qostanaı oblysynda teledıdar óndirisin qolǵa alý maqsatymen bıylǵy tamyz aıynyń basynda Indýstrııalyq aımaqty arnaıy kórip qaıtqan bolatyn.
Názıra Járimbet,
«Egemen Qazaqstan»
Qostanaı
