Kóshbasshynyń kóregendigi

Jaqsyǵa qashanda jan súısinedi. Osyndaı kıeli Táýelsizdiktiń uly toıy Astana qalasynda bar­lyq sán-saltanatymen atalyp ótti. El táýel­siz­diginiń mereıine arnalǵan saltanatta Qazaqstan Respýblıkasynyń Prezıdenti – Ult Kóshbasshysy Nursultan Nazarbaevtyń sózi otandastarymyzdyń kóńilinen shyqty. Tebirentti, aldaǵy kúnderine jol siltedi. Memleket basshysy halqymyzdyń azattyq rýhyn tereń sezingeni men ótken ómir belesterinde bastan keshken taǵdyr teperishterin jeńgenin de erekshe yqylaspen ortaǵa saldy. Júıeli sóz ıesin taýyp, qoldaýǵa ulasty. Qaı zamanda da adam armansyz bolǵan emes. Al, keń-peıil qazaq halqynyń asyl armany erkindik, azattyq, teńdik bolǵanyn keń-baıtaq dalany basqynshy jaýdan qorǵaǵan bahadúr babalardyń erlikteri arqyly kóz jetkizip kelemiz. Jalpy alǵanda ótken jıyrma jylda júzdegen jyldarǵa tatyrlyq jumys jasaldy. Bir ǵana Arqa tósindegi ásem Astananyń sán saltanaty dosty súıindirip, dushpandy kúıindiretindeı ekenin kórip kelemiz. Elbasynyń sózinde elimizdegi qoǵam damýynyń barlyq salasy qamtyldy. Sonymen qatar, ótken jyldary densaýlyq saqtaý júıesi túbegeıli ózgergeni de áńgimeniń arqaýyna aı­naldy. Adamnyń deniniń saý bolýy elimizdegi áleýmettik ekonomıkalyq jaǵdaıǵa tikeleı baılanysty ekenin jasyrmaımyz. Bul jaǵynan alǵanda elimizde aýyl sharýa­shylyǵy men ındýstrıylyq saıasattyń jan-jaqty damýy nátıjesinde azyq-túlik molshylyǵyn jasaýdyń alǵysharttary qalandy. Sapasyna kóńil bólingeni qýantady. Memlekettik turǵyn úı baǵdarlamasymen az qam­tylǵan otbasylary, bıýdjettik mekeme qyzmet­kerleri, dárigerler men muǵalimder baspanamen qamtyldy. Jetisý óńirinde bar sanaly ǵumyrymdy den­saý­lyq saqtaý salasynda qatardaǵy dárigerden, basshy qyzmetterge deıin kóterilip, halyqtyń deniniń saý bolýyna úles qosqanymdy maqtan etemin. Osy eń­be­gim eskerýsiz qalǵan emes. Táýelsizdigimizdiń 20 jyldyǵy qarsańynda Elbasynyń Jarlyǵymen «Qazaqstannyń eńbek sińirgen qaıratkeri» qurmetti ataǵyna ıe boldym. Árıne, mundaı senim ardager bolsam da salany damytýǵa, jastardy kásibı tur­ǵy­dan daıarlaýǵa úles qosýymdy talap etetinin túsinemin. Elbasy: «Densaýlyq saqtaýdyń medısınalyq teh^­nologııalary men ınfraqurylymyn damyta oty­ryp, biz qazaqstandyqtardyń ómir súrý jasyn uzartatyn bolamyz», degeni árıne, halyqqa degen janashyr kózqarasty bildirse kerek. Sonymen qatar, ana men náreste ólimin tómendetý, bala týýdy yntalandyrý sharalary qarastyrylǵany aıtyldy. Osynyń bári qazaqstandyqtardyń erteńge degen senimin, eńbekke degen qulshynysyn arttyratyny anyq. Eńbektiń qaı kezde de qaıtarymy bolady. Nátı­jesinde Otanymyz gúldenip, aldaǵy asýlar bıikteı túsetini aqıqat. Elbasynyń «100 mektep, 100 aýrýhana» baǵdar­la­­masymen Taldyqorǵan, Talǵar, Qaskeleń, Esik, О́tegen batyr jáne Jarkent, taǵy basqa qalalar men aýdandarda kóp salaly aýrýhanalar men emhanalar paıdalanýǵa berildi. Dárigerlik qosyndar kúrdeli jóndeýden ótse, keıbir eldi mekenderde jańalary salyndy. Joǵary bilimdi dárigerlerdiń jetispeýshiligi eskerilip, oblys ákiminiń grantymen jastar osy mamandyqqa oqytylýda. Jas dárigerler múmkin­di­ginshe baspanamen qamtylǵan. Osynyń bári Memleket basshysynyń salany damytýdaǵy qamqor­ly­ǵy ekeni daýsyz. Jáne halyqtyń densaýlyǵyn jaqsartyp, ómir súrý merzimin uzartýdyń alǵy-sharty desek te bolady. Bizge qajettisi yntymaq pen birlik. Osy qun­dy­lyqtardy berik ustap, saqtaǵanda ǵana baqy­ty­myz baıandy bolady. Taǵy bir aıtarym, jańa ǵa­syr­da týǵan Otanymyzdyń jedel damýy men ór­ken­deýine el tizginin ustaıtyn jastardyń qosatyn úlesi zor ekendigi. Demek, ata-babadan mura bolǵan jerimizde kók Týymyzdy jelbiretip, Ánurany­myz­dy shyrqatsaq, budan asqan abyroı bolmaq emes. Kóshbasshynyń kóregendik sózine uıyp, ony basshylyqqa alǵanda ǵana adaspaıtynymyz anyq. Muny jasy jetpisten asqan, kópti kórgen qarııa retinde aıtyp otyrmyn. Rahymbaı KО́ShENOV, kóp salaly klınıkalyq aýrýhananyń keńesshisi. Almaty oblysy.