Jylqy malyn halqymyz ejelden minseń – kólik, jeseń – as, ishseń sýsyn dep qatty baǵalaǵan. О́kinishke qaraı, keshegi keńes zamanynda alyp ımperııanyń Hrýshev syndy áperbaqan basshysy sol qasıetti jylqy malyna qyrǵıdaı tıgen. Abyroı bolǵanda elimiz egemendikke qol jetkizgennen bergi jerde aýzymyz aqqa jarı bastady. Sonyń bir aıǵaǵyndaı, búginde keshegi Semeı atom polıgonynyń naq irgesindegi Sarjal, Qaınar aýylynyń dańqy endi bal tatyǵan sary qymyzymen búkil el kóleminde tanylyp qaldy. Sarjalda qymyz sehy jumys istep tur. Sonyń nátıjesinde qutyǵa quıylǵan qymyz alys-jaqyn jerlerge tolassyz jóneltilýde.
Endi, mine, bıylǵy jyldyń naýryz aıynan beri qymyz untaǵyn daıyndap, ony tipti shetelderge jóneltýmen aınalysatyn «Igerý» atty kásiporyn iske kirisip ketti. Elbasymyzdyń Qazaqstan halqyna arnaǵan bıylǵy Joldaýyna oraı ınnovasııalyq úrdisti ıgerý maqsatymen ashylǵan bul kásiporyn qaladan Abaı eline shyǵaberiste ornalasqan. Mundaǵy qurǵaq qymyz óndirisi nemis tehnologııasymen ázirlenedi. Qazirde júz lıtr saýmaldan úsh kılo qurǵaq untaq alynýda. Eýropa elderinde onyń bir kılosynyń baǵasy 20-25 eýro turatyn kórinedi. Al kári qurlyq turǵyndary oǵan nege qumartyp otyr degenge keletin bolsaq, bıeniń jańa saýylǵan súti ana sútiniń quramyna 90 paıyz jaqyndaıdy eken. Sol sebepten de Eýropańyzda álgi qymyz untaǵy negizinen kosmetologııa, farmasevtıka salasynda, balalardyń dıetaly taǵamdaryna qoldanylýda. Sondaı-aq, bul ónimge ǵaryshkerler, alpınıster men shahterlardyń da suranysy artyp otyrǵan kórinedi.
Osyndaı ıgilikti sharýamen aınalysatyn «Igerý» kásiporny Semeıdegi «Ibraev-K» óndiristik kooperatıviniń quramynda jumys jasap jatyr. Atalǵan kooperatıvtiń bas dırektory Ǵabbas Ibraev buryn temir jol salasyndaǵy eren eńbegimen kózge tússe, endi tyń bastamany qolǵa alyp otyr. Onyń san-salaly eńbegi eskerýsiz qalyp otyrǵan joq. Sonyń aıǵaǵyndaı, ol búginde oblystyń qurmetti azamaty, oblystyq máslıhattyń depýtaty. «Igerýdiń» ıgiligin el kórip jatsa, maqsatymyzdyń oryndalǵany deıdi ol.
Dáýlet SEISENULY.
SEMEI.
