QR Konstıtýsııasy kúni qarsańynda Almaty qalalyq soty men Ulttyq kitaphananyń uıymdastyrýymen «Konstıtýsııalyq qundylyqtar, Qazaqstannyń zańnamasy jáne quqyq qoldaný tájirıbesinde olardy júzege asyrý joldary» dástúrli dóńgelek ústeli jalǵasyn tapty.
Is-sharanyń alǵashqy bólimi kitap kórmesinen bastaldy. Ulttyq kitaphananyń dırektory Janat Seıdýmanov «Konstıtýsııa – Qazaqstannyń órkeni men órleýiniń negizi» kórmesimen tanysytyryp, el táýelsizdigi jyldarynda jaryqqa shyqqan quqyq salasyndaǵy ádebıetterdiń mańyzdylyǵyn atap ótti.
Dóńgelek ústeldi Almaty qalalyq sotynyń tóraǵasy Baqytjan Qaramanov júrgizip, Konstıtýsııa – Qazaqstan halqynyń erkindigin, onyń demokratııalyq, zaıyrly, quqyqtyq jáne áleýmettik memleket retinde damýyn, onyń basty qundylyǵy – adam, onyń ómiri, quqyǵy men bostandyǵy aıasyndaǵy mańyzdy máselelerge toqtaldy.
Is-sharaǵa Almaty qalalyq sotynyń sýdıasy Q.Qalekeeva, ál-Farabı atyndaǵy Qazaq Ulttyq ýnıversıteti Zań fakýltetiniń dekany D.Baıdeldınov, zań ǵylymdarynyń doktory Q.Aıtqojın, Áýezov aýdanynyń prokýrory M.Tileýberdıev, advokat N.Jazylbekov, Bostandyq aýdandyq sotynyń sýdıasy G.Talapova, sonymen qatar qorǵaý organdary, ádilet, eńbek, áleýmettik qorǵaý jáne kóshi-qon, memlekettik kirister, notarıýstar, advokattar, belgili ǵalymdar, qoǵam qaıratkerleri qatysyp, Ata zań tóńiregindegi quqyqtyq máselelerge toqtaldy.
Elvıra Serikqyzy,
«Egemen Qazaqstan»
ALMATY
