Mine, Astananyń jupar aýasyn jutyp, aqynnyń óleń joldaryndaı sulý ǵımarattaryna tamsanyp júrmiz. Kúni keshe kelgen qonaqtar Býrabaıǵa, Baıanaýylǵa baryp, qazaq dalasynyń qasıeti men qasterin uǵynǵandaı bolyp qaıtty. Ásirese, shetelden kelgen qonaqtardyń áseri erekshe.
Bizdiń ulttyq maqtanyshymyzǵa aınalǵan Astana – asyl tastan turǵyzylǵan asqaq qala. Erke Esildiń jaǵasynda ornalasqan, jańa ǵasyr ǵajabynan jaralǵan ertegideı elorda, álemdegi eń jas qala. Keń daladaǵy jaı qala ǵana emes, saıası erik-jiger, úkili úmit, kórkeıý, táýelsizdik kórinisiniń nyshany.
Astana shańyraǵy áli de sharyqtaı túspek. Jańa astananyń keleshegi tolyǵymen XXI ǵasyrdyń enshisinde. Astananyń áli de bolsa kórkeıe túsýine biz, qalamgerler qaýymy da óz úlesimizdi qosyp kelemiz. Elordamyzdyń ańyzǵa bergisiz kelbeti men suńǵaq kúmbezderin jyrǵa qosyp, qala turǵyndarynyń tynys-tirshiligin, ómirin arqaý etken shyǵarmalardy kóptep jazyp, Astanamyzdyń mereıin ústem etý jolynda eńbektenýdemiz.
Osynaý jas qala ataýynyń ózinde sakraldyq mán bar. «Astana» negizinen parsy sózi, qazaqsha túsinigi astana – tabaldyryq, bosaǵa, kireberis, saraıdyń qaqpasy, saltanatty orda esigi degen uǵymdardy bildiredi.
Tarıhqa baı Saryarqanyń ulan-baıtaq jerinde, qazaq jeriniń qasıetti ortalyǵynda memleketimizdiń jańa astanasynyń boı kóterýi, jańa bir mádenı-ǵylymı, saıası ortanyń shoǵyrlanýy, Otanymyzdyń kórkem, sáýletti, qýatty ordanyń dúnıege kelýi ıgiliktiń nyshany dep bilemiz.
Astanaǵa qydyryp kelgen árbir adamnyń kóńilinde erekshe bir sezim men tolqý, asqaq maqtanysh pen sarqylmas án terbelip jatady desek qatelespegen bolar edim.
Arý qalanyń árbir oralymyn ashyq burqaqty aýlalar men ásem bezendirilgen gúlzarlar kómkergen. Shahardyń tórinen boı túzegen «Nur Astana» meshiti men «Báıterek», «Táýelsizdik jáne kelisim saraıy», «Han Shatyr», taǵy basqa saıası jáne mádenı ortalyqtar men túrli tarıhı memorıaldy keshender jańa ǵasyrdaǵy Qazaqstannyń ajar-kelbeti dep nyq senimmen aıta alamyn.
Astana qalasynda ótken EKSPO búkilálemdik biregeı kórmesi mańyzy jaǵynan dúnıejúzilik ekonomıkalyq forýmdarmen, týrıstik tartymdylyǵymen álemdik deńgeıde kórinis tapty. EKSPO-2017 halyqaralyq kórmesiniń taqyryby – «Bolashaqtyń energııasy». Kórme árıne, eldiń óndiristik qýaty men ǵylymı bazasyn tehnologııalyq jáne ekonomıkalyq jaǵynan jańǵyrtý jolynda úlken progress boldy dep bilemiz. Astana qalasy álemniń túkpir-túkpirinen kelgen túrli mádenıetter únine tolýymen qatar, ásem qala óziniń kórikti beınesimen qyzyǵýshylyq áserin mol týǵyzdy dep senemin.
«Astana búginde – Qazaqstan jetistigi men jeńisteriniń sımvoly», dep Elbasymyz N.Nazarbaevtyń aıtqany esh shúbásyz shyndyq. Jańa astana salý ıdeıasynyń avtory Elbasymyzdyń «Rýhanı jańǵyrý» tarıhı strategııalyq baǵdarlamasy mine, qazirdiń ózinde nátıjesin berýde.
Bul shara da «Rýhanı jańǵyrýdyń» kórinisi. Aqyndar da, halyq ta ishteı túlep, jandary nurlanyp jatqany kózderinen-aq kórinip tur.
«Aq ordaly Astanam» jyr keshine jınalyp, aqyndardyń jyryna sýsap otyrǵan astanalyq aǵaıynnyń aqedil kóńiline myń alǵys!
Ulyqbek Esdáýlet,
Qazaqstan Jazýshylar odaǵy basqarmasynyń tóraǵasy
