Fınalda Naomı Osaka álemdegi eń áıgili tennısshilerdiń biri ári biregeıi 36 jastaǵy Serena Ýılıamspen kezdesti. «Úlken dýlyǵa» sanatyndaǵy týrnırlerdiń jekelegen saıynda 23 márte top jaryp, juptyq básekede 15 ret dara shyqqan dańqty qarsylasynan esh qaımyqpaǵan 20 jastaǵy japon qyzy bul matchty 6:2, 6:4 esebimen óz paıdasyna sheshti. Osy oıyn barysynda AQSh tennısshisiniń júıkesi syr berip, janjal shyǵarǵanyn da aıta ketýge tıispiz. Serena qolyndaǵy raketkany syndyryp, birneshe ret tóreshini balaǵattady. Endi ol osy áreketi úshin 17 myń dollar kóleminde aıyppul tóleıtin boldy. Al Naomı Osaka óziniń sportyq ǵumyryndaǵy ázirge eń iri tabysqa qol jetkizip otyr. Osy kúnge deıin birde-bir Japonııanyń ókili dál osyndaı dárejege jetken joq edi.
Erlerdiń fınaldyq saıysy yń-shyńsyz ótti. Aqtyq synda serbııalyq Novak Djokovıch pen argentınalyq Hýan-Martın del Potro sheberlik baıqasty. «Úlken dýlyǵa» dodasynda 13 márte dara shyǵyp, barlyq 9 «Masters» týrnırlerinde aldyna jan salmaǵan qart qurlyqtyń ókiline Ońtústik Amerıkanyń oǵlany jarytyp qarsylyq kórsete almady. Úsh settik saıys 6:3, 7:6, 6:3 esebimen aıaqtaldy.
Jekelegen saıysta jeńimpaz atanǵan qos tennısshi – Naomı Osaka men Novak Djokovıch 3,8 mıllıon AQSh dollaryn oljalady. Fınalda óner kórsetken Serena Ýılıams pen Hýan-Martın del Potro $1,85 mıllıondy ıemdenedi. Jartylaı fınalǵa joldama alǵan oıynshylar $925 myńdy enshilese, shırek fınalǵa shyqqandar $475 myńdy qaltaǵa basty.
AQSh-tyń ashyq birinshiliginde Qazaqstannyń úsh tennısshisi óner kórsetti. Solardyń arasynan eń táýir nátıjege Mıhaıl Kýkýshkın qol jetkizdi. Úshinshi kezeńde kúsh synasqany úshin ol $156 myńdy ıelendi. Iýlııa Pýtınseva men Zarına Dıas ózderiniń tusaýkeser kezdesýlerinde utylyp qaldy. Desek te olar da Nıý-Iorkten qur alaqan qaıtqan joq. Osy dodanyń alǵashqy aınalymynda baq synaǵan oıynshylar úshin $54 myń kóleminde syıaqy qarastyrylǵan.
Ǵalym SÚLEIMEN,
«Egemen Qazaqstan»
