Sporttyq sharaǵa qatysýǵa Qazaqstannan jáne Germanııa, Reseı, Japonııa, Italııa, О́zbekstan, BAÁ, Shvesııa, Ońtústik Koreıa, Ulybrıtanııa, AQSh, Qyrǵyzstan, Fransııa, Túrkııa, Aýstralııa, Kenııa, Efıopııa, Erıtreıa, Grýzııa, Lıýksembýrg jáne Ispanııa syndy álemniń 20 memleketinen 4000-ǵa jýyq adam nıet tanytqan.
Uıymdastyrýshylar qatysýshylar sany 5000-ǵa jýyqtaıdy dep otyr, onyń 320-sy – sheteldik agentter. Marafon qashyqtyǵynyń baǵytyn IAAF (Halyqaralyq jeńil atletıka federasııalarynyń qaýymdastyǵy) sertıfıkattaǵan. «Astana Marathon-2018» jasy 18-den asqan qatysýshylarǵa 42.2 km, al 16 jáne odan joǵary jastaǵylarǵa 10 km qashyqtyqty baǵyndyrýdy usynady. Marafonnyń eń qashyq dıstansııasyn júgirip ótýge 6 saǵat ýaqyt beriledi. Bul reglamentte úlgermegen atletter dıskvalıfıkasııalanyp, baǵyttan alynady.
Marafonǵa qatysý úshin www.astana42k.com saıtynda onlaın tirkeýden ótý qajet. Marafonǵa qatysý quny 42.2 km dıstansııaǵa – 8000 teńge, 10 km-ge – 4000 teńge. Qalyptasqan dástúr boıynsha jınalǵan qarajat qaıyrymdylyq maqsattarǵa baǵyttalady. Marafon 16 qyrkúıek, jeksenbi kúni saǵat 07:00 men saǵat 13:00 aralyǵynda ótedi. Qatysýshylar jınalatyn oryn: Rysqulov k-siniń Túrkistan k-simen qıylysy, R4 turaǵy (EKSPO-a qarsy) tańǵy saǵat 06:00-de. Atap óterligi, bıyl Astana Marathon Halyqaralyq marafondar jáne júgirýler qaýymdastyǵyna (AIMS) endi, sondaı-aq, Astanadaǵy júgirý marafony Halyqaralyq jeńil atletıka federasııalary qaýymdastyǵynyń Bronze Label qurmetti sertıfıkatyn alýǵa úmittenip otyr. Kóptegen sheteldik agentterdiń Astana Marathon-dy ótetin aýmaqtaǵy jerdiń jazyqtyǵyna jáne klımatyna baılanysty tańdaıdy, óıtkeni bul jaǵdaılar júgirýshilerge qashyqtyqty ońaı baǵyndyrýǵa jáne álem rekordtar ornatýǵa múmkindik beredi.
Sondaı-aq, bıyl Efıopııa, Kenııa, Erıtreıa jáne Ýganda elderinen qatysýshylar sany kóp. Eske salsaq, ótken jyly Astana Marathon Qazaqstannyń 22 qalasynan jáne 19 memleketten 16 men 80 jas aralyǵyndaǵy 5 myń qatysýshynyń basyn qosty. Astana Marathon 2017 sharasyna marafondyq dıstansııalarda joǵary nátıjeler kórsetip kele jatqan Kenııalyq Saımon Kıprýgýt Kırýı (Simon Kiprugut Kirui) jáne Genrı Kıpsang (Henry Kipsang) syndy alys qashyqtyqtardy baǵyndyratyn atletterdiń qatysýymen erekshelendi. Astana Marathon-nyń bastalýyna negiz bolǵan qaıyrymdylyq júgirýler 2009 jyldan beri ótkizilip keledi. Osy ýaqyt ishinde qazaqstandyq qaıyrymdylyq uıymdarǵa jarystardy ótkizýden jınaqtalǵan 36 mln teńge qarjy aýdaryldy.
