«Embimunaıgaz» aksıonerlik qoǵamynyń «Jaıyqmunaıgaz» MGО́B-ge qarasty ken alańynyń ashylǵanyna bıyl – 50 jyl. Mereıli data ataýsyz qalmady. Ken alańynan bastalǵan saltanat aýdan ortalyǵynda jalǵasyn taýyp, jańa nysandar paıdalanýǵa berildi, mádenı sharalar uıymdastyryldy.
S.Balǵymbaev kenishinde munaı-gaz daıyndaý jáne aıdaý, munaı óndirý sehtary men óndiristik qural-jabdyqtardy jóndeý jáne prokattaý bólimshesi jumys isteıdi. Ken alańyndaǵy uńǵymalar jumysy tolyqtaı avtomattandyrylǵan.
«1971 jyly jumysqa ornalastym, – dep eske alady kásiporynnyń baıyrǵy geology Qazıpa Súıinǵarıeva. – Ken ornyn alǵashqy ıgerýshilerdiń biri ekenimdi maqtanyshpen aıtamyn. Osy jerden joldama alyp, Gýbkın atyndaǵy Máskeý munaı jáne gaz ınstıtýtynda oqyp keldim. Operatordan bastap seh bastyǵyna deıingi qyzmetti atqaryp, 2006 jyly zeınetke shyqtym. Bizdiń kezimizben qazirgi jumys jaǵdaıyn salystyrý múmkin emes, biz ol kezde barlyq jumysty qolmen isteıtin edik».
Iá, qazir jaǵdaı basqasha. «Embimunaıgaz» AQ áleýmettik ahýalǵa aıryqsha kóńil bóledi. Muny saltanatty sharada «QazMunaıGaz» UK» AQ basqarma tóraǵasynyń orynbasary Qurmanǵazy Esqazıev erekshe atap ótti.
– Búgingi tańda «Embimunaıgaz» AQ óte kóne ken oryndaryn ıgerip jatyr. Soǵan qaramastan áleýmettik jaǵdaıdy jaqsartyp, jumysshylarǵa kóp kóńil bólýde. Kompanııanyń basty qundylyǵy – sizder, munaıshylar! Áleýmettik nysandardy jaqsartý jumystary jalǵasady. Munaıshylardyń kásibı merekesi qarsańynda «Qaınarmunaıgaz» MGО́B-niń Kenbaı ken alańynda 100 oryndyq jataqhananyń, «Jylyoımunaıgaz» MGО́B-ge qarasty Qısymbaı kenishinde 50 oryndyq ashanany iske qostyq. Búgin S.Balǵymbaev ken alańyndaǵy 150 oryndyq ashana sizderge esigin aıqara ashyp otyr. Ýaqyt bir ornynda turmaıdy. Bolashaqta osyndaı jumystarymyzdy jalǵastyra beremiz, – dedi óz sózinde Qurmanǵazy Orynǵazyuly.
Q.Esqazıev óziniń quttyqtaý sózinde atqarylǵan jumystarǵa da keńinen toqtaldy. Sońǵy jyldarda «Jaıyqmunaıgaz» MGО́B boıynsha 60 shaqyrymdyq óndirisishilik joldyń qurylysy aıaqtalyp, iske qosylǵanyn, sonymen qatar Qaraton qurylymynda barlaý jumystaryn bastaý jónindegi jumys jospary qolǵa alynatynyn, bul oraıda uńǵymalardyń tereńdigi 6000 metr bolatyndyǵyn da atap ótti. «S.Nurjanov, Dosmuhambetov, Aqtóbe, Novobogat kenishterinde uńǵymalardy burǵylaý jumystary qolǵa alynǵaly otyr. Búgingi tańda «Embimunaıgaz» AQ-ta 5 myńnan astam adam eńbek etedi. Bıylǵy jyly 2 mıllıon 895 myń tonna ónim ıgerý josparlanýda», dedi ol.
Merekelik shara odan ári sazdy baǵdarlamamen jáne eńbek ozattaryn marapattaýmen jalǵasty. Qara altyn óndirisiniń órkendeýine ólsheýsiz úlesin qosyp, úlgi-ónege bolyp júrgen kásibı mereke ıeleriniń bir tobyna Energetıka mınıstrliginiń «Munaı-gaz keshenin damytýǵa qosqan úlesi úshin» medali tabystaldy. Sondaı-aq «Samuryq-Qazyna» Ulttyq ál-aýqat qory» AQ, «QazMunaıGaz» UK» AQ, «Embimunaıgaz» AQ-tyń Qurmet gramotasy men Alǵys haty, Isataı aýdany ákiminiń Alǵys hattary tapsyryldy.
Marapattaý sharasyna jınalǵandardy «Embimunaıgaz» AQ-tyń basqarma tóraǵasy Ánýar Jaqsybekov quttyqtady:
– Ústimizdegi jyldyń 23 tamyzy kúni Atyraý oblysyndaǵy jumys saparynda Elbasy Nursultan Nazarbaev «Embimunaıgaz» AQ-tyń bas keńsesine keldi. Bul – embilik munaıshylar úshin úlken mártebe. 23 jyl buryn Elbasy «Qaınarmunaıgaz» MGО́B ashylý saltanatyna qatysqan bolatyn. Mine, endi Memleket basshysy ekinshi ret qazaq munaıynyń qara shańyraǵyna aıaq basyp otyr. Elbasy óndiris úderisterin qadaǵalaý ortalyǵynyń jumysymen, sonyń ishinde «Intellektýaldy ken oryn» jobasynyń jumysymen tanysty. О́zderińiz jaqsy bilesizder, bizdiń kompanııa Memleket basshysynyń tapsyrmasyna saı óndiristi jańa tehnologııalarmen qamtyp, tyń jobalardy batyl engizip keledi. 2016 jyly óndiris shyǵyndaryn ońtaılandyrý men eńbek ónimdiligin arttyrý maqsatynda qolǵa alynǵan bul qanatqaqty joba – Ýaz ken alańynda iske qosylyp, búginde tıimdiligin dáleldep te úlgergen tyń baǵdarlama. 2017 jyly joba jumysy Prorva ken alańdary tobyna taratyldy. 2024 jyldyń sońyna deıin 12 ken alańy sıfrly óndiriske kóshiriledi.
Embi óndirisin ózgeristermen, jańa tehnologııalarmen úzdiksiz qamtý eń aldymen ujymdaǵy birliktiń, aýyzbirshiliktiń jemisi dep túsiný kerek. Bul embilik munaıshylardyń berekeli tirlikteriniń arqasy dep esepteımin, sol úshin de sizderge úlken alǵys aıtamyn, – dedi quttyqtaý sózinde Ánýar Erkinuly.
S.Balǵymbaev ken alańynan bastalǵan sharalar legi Isataı aýdanynyń ortalyǵy Aqqystaý aýylynda ornalasqan «Jaıyqmunaıgaz» basqarmasy bas keńsesiniń kúrdeli jóndeýden keıingi ashylý saltanatymen jalǵasty. Qonaqtardy qarsy alǵan «Jaıyqmunaıgaz» munaı-gaz óndirý basqarmasynyń basshysy Málik Júnisov te qoınaýy qutty mekende jasalyp jatqan ıgi isterdi atap ótip, bolashaqtaǵy josparlarymen bólisti.
«Embimunaıgazdyń» elge tartýy munymen bitken joq. Tústen keıin aýdan halqy mádenıet úıine qaraı aǵyldy. Qara sózge des bermegen aqyndar aýylǵa kelip, aıtys uıymdastyrdy. Aınur Tursynbaeva, Balǵynbek Imashev, Bekarys Shoıbekov, Sara Toqtamysova, Jandarbek Bulǵaqov, jergilikti aqyndar Saadat Nurmanov, Shalqarbaı Izbasarov, Syrymbek Sársembaevtar qatysqan aıtys kórermenge erekshe kóńil kúı syılady. Al keshkisin ortalyq stadıonda N.Jantórın atyndaǵy oblystyq fılarmonııa ónerpazdary men qazaq estradasynyń ónerli juby Qydyráli Bolmanov pen Qaraqat Ábildınanyń qatysýymen gala-konsert ótti. Kún uzaqqa sozylǵan shara merekelik otshashýmen támamdaldy.
Baqytgúl BABASh,
«Egemen Qazaqstan»
ATYRAÝ
