Talapker jigit bilikti ustazdardan alǵan tálimin azdaǵan ýaqytta iske asyrdy. Ol «Týǵan jerge – taǵzym» baǵdarlamasy negizinde aýylynan jeke menshik oqý ornyn ashty.
Qandaı isti bastasań da qarjyǵa tireletindigi aıqyn. Qýanysh «Bıznestiń jol kartasy-2020» memlekettik baǵdarlamasyndaǵy ınnovasııalyq jobalarǵa arnalǵan baıqaýǵa qatysady. Kezinde osy baıqaý komıssııasynyń múshesi bolǵandyqtan bul jaǵdaıdy jaqsy bilemiz. Memleket tarapynan ınnovasııalyq jańalyǵy bar tyń jobalardy qarjylandyrýǵa beriletin tegin grantqa «qorajaı salyp, bordaqylaýǵa mal baılaımyn, basseın qazyp balyq ósiremin, sport alańyn salamyn bolmasa aldyma mal salamyn», degen jospar kirmeıdi. Bul maqsatqa jeńildetilgen nesıe bar. Tegin grant utý úshin qolǵa alǵan kásibiń elge paıdaly ári tyń dúnıe bolý kerek. Qýanysh Dáýrenbekov baıqaýda jeńiske jetip, alǵashqy bıznes kapıtalyn qurap aldy.
Qyzyljarma aýylynan ashylǵan jekemenshik mektepte 4 muǵalim men 1 logoped jumys isteıdi.
Oqý ortalyǵynda bastaýysh jáne joǵary synyp oqýshylaryna tereńdetilgen matematıka, aǵylshyn tili jáne mentaldi arıfmetıka sabaqtary júrgiziledi. Kásipker aýyl turǵyndarynyń ótinishimen logoped kabınetin ashyp, Aqtóbeden arnaıy maman shaqyrǵan eken. Balanyń bári qabiletti emes. Aralarynda sózdi buzyp sóıleıtin nemese keıbir áripterdi durys aıta almaıtyn tili múkis búldirshinder de bar. Aýylda turyp qaladaǵy bilikti mamandarǵa kórsetý, oqytý ońaı sharýa emes.
Aqtóbeden arnaıy kelgen logoped maman Gúlnaz Erlanqyzy birtalaı balanyń til múkisi túzelip qalǵandyǵyn aıtady.
Aptasyna alty kún sabaq ótkiziletin ortalyqta búginde 50-ge jýyq oqýshy bilim alyp jatyr. Oqý aqysy da aýyldyqtardyń qaltasyn qaǵa qoımaıdy.
Qýanysh Dáýrenbekov bul jetistikterine toqmeıilsip otyrǵan joq. Ol bolashaqta IT parkte rezıdent bolyp, vırtýaldy oqytý júıesin engizýge jáne Qorqyt ata atyndaǵy Qyzylorda memlekettik ýnıversıtetiniń bıznes-ınkýbator oqý ortalyǵymen birigip, mobıldi jumys júıesin iske qosýǵa jumys istep jatyr.
«Bilikti birdi, bilimdi myńdy jyǵady» degen halyq máteliniń túıini osy. Jańa jobamen jumys isteýge táýekeli jetken kásipker osylaısha bıznesin órkendetip qana qoımaı, týǵan aýylynyń qajetine jarap keledi.
Baqtııar TAIJAN,
«Egemen Qazaqstan»
Qyzylorda oblysy
