Premer-Mınıstr Derekterdi óńdeý ortalyǵynyń (DО́O) komandalyq ortalyǵy men germoaımaǵyn tekserdi. Munda qarapaıym telefon baılanysynan bastap, sıfrlyq televızııa men keń jolaqty ınternet naryǵyndaǵy sońǵy usynystarǵa deıin ártúrli qyzmetter usynylady. Qalalar men aýyldyq eldi mekender arasyndaǵy «Qazaqtelekom» AQ qyzmetterine qol jetkizý men paıdalanýdaǵy aıyrmashylyq azaıyp keledi.
«Derekterdi óńdeý ortalyǵy» ınnovasııalyq jobasy 2013 jyly Indýstrııalandyrý kartasy jobalaryn tanystyrýǵa arnalǵan jalpyulttyq telekópir kezinde óz jumysyn bastaǵan bolatyn. Bul — Orta Azııadaǵy Tier III sanatyndaǵy, ıaǵnı nysannyń jumysyn profılaktıkalyq jóndeý kezinde toqtatpaı júzege asyrýǵa múmkindik beretin senimdi ári alǵashqy joba.
«Qazaqtelekom» AQ derekter ortalyqtarynyń jelisi jalpy respýblıkany qamtıdy jáne vırtýaldy hostıng, VPS, Colocation, Dedicated qyzmetteri, sondaı-aq, bıyl shilde aıynda qosylǵan Microsoft Hosted SharePoint, Microsoft Hosted Exchange jáne beınekonferensııa baılanysy júıesi sekildi birqatar ınnovasııalyq servısterdi usynatyn 14 nysany bar.
Ortalyqtyń jumysy týraly Genesis Mining kompanııasynyń jergilikti ókili Lýkas Pfaıffer aıtyp berdi. Búginde derekter ortalyǵy elektrondy aqpartty óńdep ári saqtaıtyn 11 myńnan asa qurylǵyny qabyldaýǵa qaýqarly. Tirshilikti qamtamasyz etetin barlyq júıe mysaly, energetıka, kondısııalaý, órt sóndirý júıeleri keıinge saqtalyp, málimetterdi jiberetin magıstraldy kanaldarǵa qosylǵan. Sondaı-aq, Derekterdi óńdeý ortalyǵynda jınaqtyq esepteý tujyrymdamasy negizinde jasalǵan qyzmetter usynylady, máselen: jınaqtyq serverlik platforma, derekterdi saqtaýdyń jınaqtyq júıesi, derekterdi óńdeýdiń vırtýaldy saqtyq ortalyǵy, bızneske arnalǵan baǵdarlamalyq qamsyzdandyrý, ınteraktıvti qarym-qatynas jáne aqparatpen almasý júıesi, jınaqtyq beınekonferensııa baılanysy.
«Qazaqtelekom» AQ basqarma tóraǵasy Qýanysh Esekeev Derekterdi óńdeý ortalyǵy Qazaqstanda usynylatyn jınaqtyq qyzmetter kólemi boıynsha kósh bastap turǵanyn atap ótti. Klıentter — korporatıvtik sektor men memlekettik qurylymdardyń ókilderi. Budan ózge, DО́O reseılik klıentter men seriktesterge qyzmet usyna alady, bul — Pavlodardyń RF shekarasyna jaqyn ornalasý jaǵdaıyna baılanysty.
