Sýretterdi túsirgen Erlan OMAR
Ádebı keshke jazýshy-dramatýrg, Qazaqstannyń eńbek sińirgen qaıratkeri Roza Muqanova, aqyn Ońaıgúl Turjan, kınotanýshy, ónertaný kandıdaty Názıra Rahmanqyzy jáne «Egemen Qazaqstan» gazetiniń jýrnalısteri men ádebıet áleminde júrgen shyǵarmashyl jastar qatysty. Aıtýly kezdesýdi Bas basylymnyń basqarma tóraǵasy Darhan Qydyráli QR Aqparat jáne kommýnıkasııalar mınıstri Dáýren Abaevtyń quttyqtaý sózimen ashyp berdi.
«Qadirli Ákim Úrtaıuly! Sizdi 85 jasqa tolǵan mereıtoıyńyzben shyn júrekten quttyqtaımyn! Ult ádebıetine órnek salǵan Siz osynaý belesti qadirli tulǵa, rýhanııatymyzdyń shoqtyǵy bıik ókili retinde qarsy alyp otyrsyz. Sizdiń shyǵarmashylyǵyńyz qalyń oqyrmannyń ystyq yqylasyna ıe boldy. Birqatar týyndylaryńyzdyń jelisi boıynsha túsirilgen kórkem fılmder kórermen kózaıymyna aınaldy. «Tulpardyń izi», «Qarash-qarash», «Mustafa Shoqaı» – qazaq kınosynyń altyn qorynda saqtalatyn óte qundy dúnıeler. Izgilik, otansúıgishtik, ulttyq qundylyqtardy ulyqtaý máselelerin Siz dramatýrgııada da keńinen nasıhattap kelesiz. Osynaý tolaǵaı tabystaryńyz shabytyńyzǵa shabyt qosyp, tól ádebıetimiz tyń týyndylaryńyzben tolysa bersin deı kele, búgingi mereıtoıyńyzda Sizge zor densaýlyq, shyǵarmashylyq tabys, uzaq ta baıandy ǵumyr, áýletińizge baq-bereke tileımin!» delingen quttyqtaý hatta.
Kezdesý barysynda qadirli qonaqtar sóz alyp, mereıtoı ıesiniń shyǵarmashylyq áleminen jan-jaqty syr qozǵasa, jastar jaǵy osy sátti paıdalanyp súıikti qalamgerine kókeıinde júrgen qyzyqty saýaldaryn qoıyp, tushymdy jaýap aldy. Syrlasý stılinde ótken júzdesýdiń ereksheligi de sol – munda jazýshy buǵan deıin eshbir jerde aıtylmaǵan tyń derek, qyzyqty sátterimen búkpesiz bólisti.
Oqyrmandaryna jan syryn aqtardy. Kesh sońynda «Egemen Qazaqstan» gazetiniń basqarma tóraǵasy Darhan Qýandyquly mereıtoı ıesine júrekjardy lebizin bildirip, barsha ujym atynyn shapan jaýyp, qurmet kórsetti. Shynaıy órbigen ádebı áńgimeden rýhanı lázzat alǵan oqyrman qaýym da kezdesýden marqaıyp tarqasty.
