Pavlodar óńiri iri ındýstrıaldy ortalyq bolǵandyqtan, joǵary kásibı mamandarǵa bul aımaq erekshe muqtaj. Pavlodar oblystyq bilim berý basqarmasynyń basshysy D. Bolathanulynyń aıtýynsha, aımaqta 2017 jyldan bastap metallýrgııa salasynyń mamandaryn daıyndaýǵa arnalǵan arnaıy baǵdarlama júzege asyp jatyr. Mysaly, Alıýmınıı zaýyty bazasynda jaqsy nátıje kórsetip júrgen jumyskerler arasynan bolashaq basshylar daıyndalady. Osylaısha kásiporyn aǵa býyndy almastyra alatyn kadr rezervin jasaqtaýda. Sondaı-aq, jergilikti oqý oryndary kásiporyndarmen tyǵyz baılanysta, qosarly bilim berý júıesi boıynsha tájirıbeden ótetin stýdentterde keıin turaqty jumysqa ornalasýǵa múmkindigi bolady.
Premer-Mınıstr zerthana men oqý synyptaryn aralap, tehnıkalyq-óndiristik bazamen tanysty. Kolledj metallýrgııa salasyna metall jonýshy, temir ustasy, elektr–gazben dánekerleýshi men elektrmonterlardy daıyndaıdy. Úshinshi kýrstan bastap stýdentter óndiriste jumys isteıdi. Byltyr bilim ordasy 163 mamandy daıyndap shyǵarǵan. Olardyń 97,3% jumyspen qamtyldy. Jaqyn arada Tústi metallýrgııa kolledji bazasynda Metallýrgııa salasynyń ýákiletti ortalyǵy ashylatyn bolady.
Baqytjan Saǵyntaev Stýdentter úıiniń tynys-tirshiligimen de tanysty. Kolledj dırektory A. Boldashevskııdiń aıtýynsha, 200 adamǵa shaqtalǵan ǵımarat 2017 jyly paıdalanýǵa berilgen. Stýdentter úshin bar jaǵdaı jasalǵan, tipti jattyǵý zaly men horeografııa zaly qarastyrylǵan.
Bilim ordasynyń jumysyn qaraǵan soń Premer-Mınıstr joǵary oqý oryndary, kolledj ben kásiporyn basshylary jáne stýdent jastarmen ónerkásiptik ındýstrııalandyrýdyń jańa modeline mamandardy daıyndaý máselesi boıynsha jınalys ótkizdi.
Jıyn barysynda tehnıkalyq saladaǵy kásibı mamandardy daıarlaý, elimizde qolǵa alynyp jatqan sıfrlandyrýdy damytý kezeninde jumyskerlerdi qaıta oqytý, kolledjderdiń bedelin kóterý, sonymen qatar tórtinshi ónerkásiptik revolıýsııa jaǵdaıyndaǵy eńbek naryǵynyń qazirgi jaǵdaıy men bolashaǵy talqylandy.
Kezdesýge qatysýshylar el ekonomıkasyn damytý úshin jańa zaýyttardyń qurylysy men ınvestısııalardyń tartylýymen qatar, joǵary bilikti mamandardy daıarlaýdyń qajettiligin atap ótti. Jastardy shynaıy ekonomıkaǵa tartýdyń mańyzdy tetikteriniń biri — tehnıkalyq jáne kásiptik bilim berý (TjKBB).
Pavlodar oblysynyń ákimi B. Baqaýovtyń aıtýynsha, bul óńir — kóp salalyq ındýstrııalyq keshen. Taıaý keleshekte 14 iri ınvestısııalyq jobany iske asyrý josparlanǵan, ol 4 myńnan astam jańa jumys ornyn qurýǵa múmkindik beredi.
«Memleket basshysynyń tapsyrmasyna sáıkes, oblysta bilikti ári básekege qabiletti mamandardy daıarlaıtyn TjKBB júıesin jańǵyrtý úderisi bastaldy. Búginde 17 myń jas azamat tegin tehnıkalyq jáne kásiptik bilim alý múmkindigine ıe boldy», — dedi oblys ákimi.
Onyń aıtýynsha, oblystyń 45 kolledjinde 46 mamandyq boıynsha qosarly bilim berý júıesi iske qosylǵan. Oblystyń kásiporyndarymen yntymaqtastyq týraly kelisimsharttarǵa qol qoıylyp jatyr. Tikeleı kásiporynda ótkiziletin oqý ýaqyty 80%-ǵa ulǵaıtyldy. Sonymen qatar, TjKBB júıesin jańǵyrtý aıasynda kolledjderdi senimdi basqarýǵa berý jumystary júrgizilip jatyr. B. Baqaýovtyń aıtýynsha, osylaısha birneshe mindet oryndalady: ekonomıkanyń shynaıy sektoryn bilim berý salasyna tartý, kolledjderdiń ınfraqurylymy men bazasyn saqtaý jáne kóbeıtý.
Kezdesý barysynda beıindi mınıstrlikterdiń ókilderi de sóz sóıledi. Bilim jáne ǵylym mınıstri E. Saǵadıev bilim berý júıesin damytý týraly baıandady. Atap aıtqanda, JOO-larǵa akademııalyq erkindik berý, kolledjderdi bir baǵytqa beıindeý jáne qosarly bilim berý júıesin damytý máselelerin qozǵady. О́z kezeginde eńbek jáne halyqty áleýmettik qorǵaý mınıstri M. Ábilqasymova eńbek resýrstarynyń kóshýin basqarýǵa qatysty sóz sóıledi.
«Biz Memleket basshysynyń tapsyrmasyna sáıkes eńbek resýrstarynyń aǵynyn basqarý jóninde keshendi jol kartalaryn ázirleýge kiristik. Búginde elimizdiń iri kásiporyndarymen jumys júrgizilip jatyr. Pavlodar oblysynda 19 kásiporynmen kartalarǵa qol qoıyldy, oblystyń 9-ǵa jýyq kásiporny óndiristi jańǵyrtýdy josparlap otyr», — dedi eńbek jáne halyqty áleýmettik qorǵaý mınıstri.
Sondaı-aq, kezdesý barysynda iri kásiporyndardyń ókilderi sóz sóıledi. «Qazaqstan alıýmınııi» AQ prezıdenti R. Romanov jastardyń kásiporynda daǵdylardy úırenýi men jumysqa ornalasýy týraly aıtyp berdi. Qyzyl ásker agrarlyq-tehnıkalyq kolledjiniń dırektory S. Jartybaev aýyl sharýashylyǵy mamandyqtary boıynsha mamandardy daıarlaýdyń basym baǵyttary týraly sóz sóıledi. Qyzyl ásker agrarlyq-tehnıkalyq kolledjiniń jetekshisi A. Polıakov, Pavlodar munaı-hımııa zaýytynyń áleýmettik máseleler jónindegi bas dırektorynyń orynbasary A. Imantaeva qosarly bilim berý júıesi boıynsha stýdentterdi oqytý aıasynda kolledjdermen yntymaqtasý týraly aıtyp berdi.
TjKBB baǵdarlamasy aıasynda praktıkadan ótý kezinde jınaǵan tájirıbelerimen jáne ózderiniń oılarymen Pavlodar tústi metallýrgııa kolledjiniń túlekteri T. Kúlemshatov pen A. Magovıanov bólisti.
TjKBB júıesin engizip jatqan kásiporyndardyń ınvestısııalyq tartymdylyǵy týraly Eýropa qaıta qurý jáne damý bankiniń basshysy A. Preımanıs túsinikteme berip ótti.
