Dúnıejúzi naryǵynda 18 jyldan beri jobalaýmen jáne josparlaýmen aınalysatyn Master Concept kompanııasy negizinen týrıstik nysandardy ınvestısııalaıdy. Kompanııanyń Reseıdegi jumys tájirbıesi 10 jyl bolsa, Qazaqstanda 6 jyldan beri qyzmet kórsetip keledi. Kompanııa ókili, sáýletshi Gernot Lıaıtnerdiń aıtýynsha, Master Concept Talǵar aýdany aýmaǵyndaǵy «Lesnaıa skazka» kýrortyn otbasylyq-sporttyq demalys orny retinde damytýǵa kirispek. Qazir kompanııa Almaty óńirindegi taý týrızmi josparyna qajetti zertteý jumystaryn bastaǵan. Bul oraıda eki model qarastyrylyp otyr. Birinshisi, burynnan bar, jumys istep turǵan kýrorttardy odan ári damytýdyń áleýetin zerdeleý, ekinshisi qaı jerlerde týrıstik baǵyttardy damytýǵa bolatynyn bilý úshin taýly jerlerdi zertteý.
Al eki jaqty kezdesýge qatysqan Almaty óńiriniń týrıstik klasteri qaýymdastyǵynyń quryltaıshysy Raıymbek Batalov taý týrızminiń damýy shaǵyn jáne orta bıznestiń damýyna, qyzmet kórsetý salasyna tyń serpin beretinin aıtady.
- Taý týrızmi degende tek Almaty mańynan ózge, Sharyn shatqalyn, Lepsi óńirindegi, Raıymbek aýdanyndaǵy taýly óńirlerdi de tolyq qamtýǵa tıispiz. Taýly aımaqtardyń múmkindikterin búge-shigesine deıin zerttep, tanı alatyn mamandardyń bilimi men biligin paıdalana bilýimiz kerek. Jalpy tabıǵı-klımattyq erekshelikterine baılanysty Almaty óńirindegi taý týrızminde qalaǵa qaraǵanda Almaty oblysynyń úlesi áldeqaıda basym. Sondyqtan qysta ǵana emes, jyl boıy úzdiksiz jumys isteıtin taý kýrorttaryn damytýdyń josparlary da jasalýy tıis, tehnıkalyq-ekonomıkalyq negizdemeler ázirleýge qansha qarajat qajet ekenin de esepteýimiz qajet. Odan ári bul jobanyń operatory naqty qaı mekeme bolatynyn da anyqtaýymyz kerek, - dedi jıyndy qorytqan oblys basshysy A. Batalov.
Qalmahanbet MUQAMETQALI,
«Egemen Qazaqstan»
Almaty oblysy
