Onyń eń qyzyǵy úshinshi kezdesý tóńireginde. Jankúıerler de trılogııa bolǵanyn talap etip, eki boksshynyń qaıta kezdeskenin qalaıdy. Ataqty boksshy Djo Forman «Alvaresti jeńisimen quttyqtaımyn. Tamasha jeńis. Biraq, meniń oıymsha bul ekeýi taǵy bir ret kezdeskeni durys» depti. Shoýdy jaqsy kóretin amerıkalyq teleradıolar da óz pikirlerin aıtty. «Ekeýi de pancher. Únemi nokaýttarmen jeńiske jetedi. Birin biri sulatyp salǵanyn kórgimiz keledi» degen syńaıda sóz qozǵady. Kezdesý aıaqtalysymen Gennadıı Golovkın tilshilirmen kezdesip, alǵashqy jeńilisi jaıly aıtty. «Men kezdesýde kim jeńgeni jaıly daý qozǵamaımyn. Tóreshiler «Kanello» jeńdi dep sheshti. Demek, qarsylasymdy jeńisimen quttyqtaımyn! Men ózimdi oǵan qaraǵanda myqtyraq bokstasyp júrmin dep oılappyn. Eń bastysy fanattarǵa unaǵan sekildi», dedi. Tilshiler taǵy bir kezdesý bolsa rıngke shyǵýǵa qalaı qaraısyz dep edi Gena «kezdesýdiń sharttary jaqsy bolsa, nege shyqpasqa?!» dep taǵy bir rematchqa qarsy emestigin bildirdi.
Al odan keıin kezek «Kanelloǵa» keldi. Ol aldymen osy ekinshi kezdesýde anyq jeńiske jetkenin aıtyp, Golovkındi upaımen utqanyna qýanyshtymyn dedi. Sonymen qatar, Golovkınmen úshinshi kezdesýge shyǵýdan da bas tartpaıtynyn jetkizdi. Demek, amerıka baspasózi qazir osy boksshynyń taǵy bir kezdesýi bolýy yqtımal ekenin jarysa jazýda.
36 jastaǵy boks ardageri sanalatyn Golovkınniń jeńilýine baılanysty eń kóp kezdesetin aqtalý onyń jasy bolyp tur. Qarsylasy Saýl Alvares nebári 28 jasta. Golovkınnen 8 jas kishi. Kúsh-qaıraty tasyp, naǵyz tolysyp turǵan shaǵy. Kún ótken saıyn qazaqstandyqtyń soqqysy álsirep, jyldamdyǵy tómendeıtini anyq, al meksıkalyq áli birneshe jyl kerisinshe kúsheıe beredi.
Bul joly da telekórsetilim reıtıngi joǵary bolǵan, satylym ári aqyly kórsetilimder de qomaqty qarjy túsirgen. Jarnamalyq jobalardyń túgeli iske asty, býkmekerlik keńseler de paıdaǵa keneldi. Uıymdastyrýshylar eki promoýterlik kompanııa kelisimge kelse, taǵy bir márte kezdesý ótkizip beremiz dep qulshynyp otyr. Araǵa apta salǵan soń, barlyǵy tynyshtalyp, eki boksshy medesınalyq tekseristen ótken soń, shamalaryn boljaı kele qaıta aıqasamyz dep shyǵyp jatsa tań qalmaımyz. Áliptiń artyn baǵaıyq. Sebebi, mundaı deńgeıde bokstasatyn ekeýine basqa qarsylas ta joq.
Ermuhamed Máýlen,
«Egemen Qazaqstan»
