Respýblıka óńirlerinen eki júzge tarta, sondaı-aq AQSh, Túrkııa, Reseı, Belarýs, О́zbekstan, Tájikstan, Qyrǵyzstan jáne t.b. shet memleketterden kelgen kiaphana salasynyń mamandary sońǵy jıyrma jyldaǵy jetistikter men qordalanǵan máselelerge oraı pikir almasty.
Sezdiń resmı bóliminde QR Parlament Senaty Áleýmettik-mádenı damý jáne ǵylym komıtetiniń tóraıymy Birǵanym Áıtimova mádenıet salasy, onyń ishinde kitaphanashylardyń qyzmetine qatysty talaptar zańmen únemi tolyqtyrylatyndyǵyn atap ótip, kitaphanalar qyzmetiniń ázirge bir ǵana bappen shektelip otyrǵandyǵyna toqtaldy. Dese de, kitaphanaǵa qatysty mańyzdy máselelerdi sheshýge úkimet tarapynan turaqty kóńil bólinip keledi. Aldaǵy ýaqytta kitaphanalarǵa qajettilik máselesi memlekettik granttar aıasynda jandana túsýi tıis. Al kitaphanalardyń kóbeıýi elimizdiń ıntellektýaldy deńgeıiniń artýyna zor yqpal etetini sózsiz.
Zamanaýı tehnologııalar ǵasyrynda ádebı muramyzdy saqtap qalý, sırek basylymdardy qalpyna keltirý, kóne qaripte basylǵan baspa ónimderin syry men synyn buzbaı keleshek urpaqqa jetkizý osy sezdiń basty taqyrybyna aınaldy. Kitaphanashylar kezdesýinde pikirin bildirgen aqyn Oljas Súleımenov ádebıet, kitap taqyrybynyń kúndelikti ómirimizben baılanysy onyń jarqyn kelesheginen habardar etedi. Kitap barda adamzattyń mádenıeti men bilimi bar, dep atap ótse, ǵalym Ábsattar Derbisáli kitaphanalar sonaý kóne ǵasyrlardan bastaý alatynyn ári kóptegen ǵulamalarymyzdyń, onyń ishinde ál-Farabı sııaqty tulǵalardyń ǵylymı turǵydan damýy kitaphanalar qyzmetimen tyǵyz baılanysty ekendigine toqtaldy.
Kitaphanalardyń ómirsheń bolýy bilimdi, jarqyn keleshektiń kelbetiniń jarqyn kórinisi. Kitaphananyń jahandaný ǵasyrynda mádenı ınstıtýt mártebesin saqtaýyna qoǵamnyń qosar úlesi zor. Osy turǵyda sóz sóılegen Almaty qalasy Mádenıet jáne arhıvter basqarmasy basshysynyń orynbasary Danııar Álıev, Qazaqstan Jazýshylar odaǵynyń tóraǵasy Ulyqbek Esdáýlet, Ulttyq kitaphana dırektory Janat Seıdýmanov, Reseı memlekettik kitaphanasynyń dırektory V.V.Dýda, IýNESKO ókilderi kitaphana men kitaphanashynyń qoǵamdaǵy róline qatysty mańyzdy jaıttarmen bólisti.
Eki kúngi sezd aıasynda salada sheshilýge tıisti kóptegen máseleler nazarǵa alynyp, kitaphana jelisiniń sapaly adamı kapıtaldy qalyptastyrýdaǵy jáne qoǵamdyq sanany jańǵyrtýdaǵy róli men orny, kitaphana salasyn damytý, sıfrlandyrý júıesindegi kitaphanalar, arnaıy kitaphanalardy sandyq ortaǵa ıntegrasııalaý jáne zamanaýı formatta damytý sııaqty ózekti taqyryptar qozǵaldy.
Elvıra Serikqyzy,
«Egemen Qazaqstan»
ALMATY
