Baspasóz týry Memleket basshysy Nursultan Nazarbaevtyń «Rýhanı jańǵyrý» baǵdarlamasy aıasynda júzege asyrylyp otyr. Týrǵa mádenıet jáne óner salasynda mamandanǵan Ulybrıtanııa, Italııa, Polsha, Qytaı, Koreıa jáne Indonezııadan kelgen jýrnalıster qatysty. Týrdyń alǵashqy kúni tilshiler elordadaǵy Qazaq Ulttyq О́ner ýnıversıteti, Ulttyq mýzeı men «Astana-Báıterek» monýmenti syndy elordanyń kórikti jerlerin aralap, qala kelbetimen tanysty. Sondaı-aq «Astana Balet», «Astana Opera», «EXPO-2017» aýmaǵynda ornalasqan qazaqstandyq «Nur Álem» pavılonynyń ekspozısııalary tanystyryldy.
Kelesi kúni ońtústik jurtshylyǵy sheteldik qonaqtardy qazaqy dástúrmen qarsy aldy. Baspasóz týrynyń qatysýshylaryna ejelgi Otyrar kóne shaHary, Qoja Ahmet Iаsaýı men Arystan bab keseneleri, Áziret Sultan memlekettik tarıhı-mádenı murajaı-qoryǵyna ekskýrsııalar uıymdastyryldy. Sonymen qatar jýrnalıster Otyrar memlekettik arheologııalyq qoryq-mýzeıin aralap, ólke tarıhyna qanyqty. Qonaqtar ulttyq taǵamdar qoıylǵan dastarhannan dám tatyp, otyrarlyq ónerpazdardyń án-jyryna qulaq túrdi. Qonaqtar jolǵa attanar aldynda aýdan basshysy úsh tilde jaryq kórgen «Otyrar jádigerleri» kitabyn syıǵa tartty.
Almatyǵa sapar barysynda jýrnalıster qaýymy kórkemsýret murajaıy, Á.Qasteev atyndaǵy О́ner murajaıy, Almaty murajaıy, «Transforma» teatr alańy, «Esentai Gallery» óner galereıasy, Dástúrli mýzykanyń mýltımedıa ortalyǵy, «Qazaq-Oner» qolóner ortalyǵy, jas qazaq aqyndarymen kezdesý sııaqty mádenı is sharalarǵa qatysty. Sondaı-aq kórikti mekenniń úzdik týrıstik ortalyqtary jýrnalıster qaýymyn ádemi kelbetimen tańqaldyrdy.
Indonezııanyń «Indonesia Tatler» gazetiniń jýrnalısi Lıvıanı Sıntıanany elordamyz óziniń ásem ǵımarattarymen baýrap alǵan. «Astana qalasy Batys pen Shyǵys mádenıetin, dástúrin toǵystyrǵan zamanaýı qala dep aıtar edim. Ulttyq naqyshtaǵy kórnekti oryndar men monýmentter, erekshe sáýlettik ǵımarattardy, mádenı oryndar men saıabaqtar Astananyń ajaryn asha túskendeı» dedi ol.
Koreıanyń «International Policy Digest» agenttiginde qyzmet etetin ulybrıtanııalyq jýrnalıst Djon Laıman Qazaqstanǵa alǵash ret kelgen. «Qazaqstannyń ózine tán erekshe stıli bar. Mysaly Astana - zamanaýı ónerdiń, mádenıettiń ordasy. Astana qurylysy eýropalyq jáne shyǵys stıliniń eń ozyq arhıtektýralyq stılin aıshyqtap tursa, Túrkistan qalasy orta ǵasyrlyq sáýlet óneriniń búginge deıin buzylmaı saqtalǵan eń bir ozyq úlgisi» dep óz oıymen bólisti.
«Jahandyq álemdegi zamanaýı qazaqstandyq mádenıet» jáne «Qasıetti Qazaqstan» jobalary aıasynda uıymdastyrylǵan bul baspasóz týry el týrızmin damytýǵa jáne Qazaqstannyń damyp kele jatqan memleket retindegi ımıdjin qalyptastyrýǵa oń áserin tıgizedi.
Mádına JÁLELQYZY,
«Egemen Qazaqstan»
