Otyrysty ashqan G.Ábdiqalyqova sybaılas jemqorlyqqa qarsy is-áreket Qazaqstanda memlekettik saıasattyń mańyzdy strategııalyq basymdyǵy retinde qarastyrylatynyn atap ótti. Elbasy Nursultan Nazarbaev óziniń Qazaqstan halqyna arnaǵan qańtardaǵy Joldaýynda sybaılas jemqorlyqtyń aldyn alý jolyndaǵy kúresti jalǵastyrý qajettigin aıtqanyna da toqtaldy.
«Búgingi jıyn selektorlyq formatta ótedi. Is-sharaǵa Almaty, Astana, Shymkent qalalarynyń jáne oblystardyń basshylary, sonymen qatar óńirlik komıssııalardyń músheleri qatysyp otyr. О́zderińizge belgili, Elbasy Nursultan Nazarbaev barlyq salalarda sybaılas jemqorlyqpen kúrestiń tıimdiligin arttyrýdyń mańyzdylyǵyna jáne tıisti aldyn alý sharalaryn júrgizý qajettigine basa nazar aýdaryp otyr», dedi Memlekettik hatshy.
Otyrysta jer qatynastary salasynda zańdylyqty saqtaý máseleleri, bilim berý isine bıýdjet qarajatyn tıimdi paıdalanýdy qamtamasyz etýi baǵytynda qabyldanyp jatqan sharalar talqylandy. Jıyn barysynda Bas prokýratýranyń, Memlekettik qyzmet isteri jáne sybaılas jemqorlyqqa qarsy is-qımyl agenttiginiń, Respýblıkalyq bıýdjettiń atqarylýyn baqylaý jónindegi Esep komıtetiniń, Aýyl sharýashylyǵy, Bilim jáne ǵylym mınıstrlikteriniń baıandamalary tyńdaldy.
Jer qatynastary sybaılas jemqorlyq beleń alǵan salanyń biri ekeni belgili bolyp otyr. Tek sońǵy 2,5 jyldyń ishinde bul sala boıynsha sybaılas jemqorlyqqa qarsy qyzmet 457 qylmysty tirkegen. 78 adam sottalǵan. Prokýrorlyq tekseris nátıjesi boıynsha jerge qatysty zańnamany qoldaný salasynda 342 adam, onyń 24-i memlekettik qyzmettiń bedeline nuqsan keltirgeni úshin túrli jaýapkershilikke tartylǵan.
Osy oraıda otyrys barysynda jer týraly zańnamany, jeke baspana qurylysy úshin jer berý kezinde kezekti jáne memlekettik qyzmetter kórsetý merzimderin saqtaý, kommersııalyq jerlerdi bássaýdasyz ıelenýge jol bermeý qajettigine múddeli memlekettik organdardyń nazary aýdaryldy.
Bilim salasynda 2016 jyldan beri sybaılas jemqorlyq sıpattaǵy 510 qylmys tirkelip, olarǵa qatysty 178 adam sottalǵan. Áleýmettik saýalnamalar joǵary oqý oryndaryndaǵy bilim berýde, mektepke deıingi mekemelermen balalardy qamtýda sybaılas jemqorlyq deńgeıi joǵary ekenin kórsetken.
Talqylaý nátıjesinde komıssııa tarapynan ókiletti memlekettik organdarǵa anyqtalǵan zań buzý jaıttaryna qatysty taldaý júrgizip, olardyń aldyn alý úshin tıisti tetikter ázirleý arqyly sharalar qabyldaý jóninde tapsyrma berildi.
Jıyn sońynda G.Ábdiqalyqova sybaılas jemqorlyqsyz quqyqtyq memleket qurý baǵytynda elde júrgizilip jatqan reformalar Qazaqstannyń 2025 jylǵa deıingi strategııalyq damý josparynyń basty mindetteri – jedel ári sapaly ekonomıkalyq ósim men eldegi halyq turmysy deńgeıiniń joǵarylaýyna qol jetkizýge baǵyttalýǵa tıis ekenin atap ótti.
Abaı ASANKELDIULY,
«Egemen Qazaqstan»
