Qasym-Jomart Toqaevtyń tóra­ǵa­lyǵymen palatanyń kezekti otyrysy ótti

Senattyń jalpy otyrysynda «Stan­darttaý týraly» jáne oǵan ilespe keıbir zańnamalyq aktilerge ólshem bir­ligin qamtamasyz etý jáne standarttaý máseleleri boıynsha ózgerister men tolyq­tyrýlar engizý týraly zań jobalary birinshi oqylymda qaraldy. Bular týraly baıandamany Investısııalar jáne damý mınıstri Jeńis Qasymbek jasady. Onyń aıtýyn­sha, «Standarttaý týraly» zań jobasynda tehnıkalyq reg­lamentter júıesin shekteý, standarttaýdyń ulttyq júıesin qalyptastyrý jáne ulttyq organyn anyqtaý jáne tehnıkalyq komıtetterdiń rólin arttyrý qarastyrylǵan. «Zań jobasy negizinen metrologııadaǵy ólshem birligin qamtamasyz etýdiń jańa memlekettik qurylymyn jasaýdy jáne túzetýlerdiń jańa etalondar kalıbrovkasyna ótýin kózdeıdi. Bul halyqaralyq saýdada ólshemder nátıjesine degen senimdi arttyratyn negizgi tetikter», dedi J.Qasymbek. 

Zań jobasy Ákimshilik qu­qyq buzýshylyq kodeksine ózge­ris­ter engizip, tehnıkalyq retteý men metrologııa salasyn­daǵy buzýshylyqtardyń jaýap­ker­shiligin arttyrýdy kózdep, aıyp­puldardy úsh ese kóbeı­týdi engizgen. Al «Jol júrý tártibi týraly» Zańǵa engizgen to­lyqtyrýda – kólik quraldaryna elektrondy pasport engizý normasy qarastyrylǵan.

Negizgi baıandamashyǵa bir­ne­she suraqtar berilgen soń zań jobasy talqylanyp, onda «qa­byl­dansyn» degen bir ǵana usy­nys tústi. «Standarttaý týra­ly» zań jobasyna Senat bir ózgeris engizgen eken, ol qa­byl­danyp, Májilistiń qa­raýyna jiberildi. Al ilespe zań jobasy birinshi oqylymda ózgeris­siz maquldandy. Alaıda Ekonomıkalyq saıasat, ın­no­vasııalyq damý jáne kásipkerlik komıtetiniń tóraǵasy Asqar Beısenbaevtyń usynysymen zań jobasy osy otyrystan keıingi shaǵyn úzilisten soń ekinshi ret qaralyp, zań qabyldandy. 

Jalpy otyrysta Senattyń Konstı­tý­sııalyq zańnama, sot júıesi jáne quqyq qorǵaý organdary komıteti depýtattarynyń jol júrý qaýipsizdigi máseleleri boıynsha depýtattyq saýalyna jaýap berý de kún tártibine shyǵarylǵan eken. О́ıtkeni sa­ýal joldaǵan depýtattar ózderine jaltarma jaýaptar keletinine narazylyq bildirgen. Bul týraly depýtat Dýlat Qusdáýletov aıtyp berdi. Senatorlar 
6 qyrkúıekte depýtattyq saýal joldap, jol júrý qaýipsizdiginiń buzylýynan bolǵan apatqa 2017 jyly 24 myńnan astam adam ushyrap, onyń 2 myńy qaza tapqany sııaqty statıstıkalyq málimetter keltirip, osynyń sebebin anyqtaý maqsatynda sa­ýal joldasa, qanaǵattanarlyq jaýap bolmaǵan. Sondyqtan jalpy otyrysqa Ishki ister mınıs­triniń orynbasary Erlan Turǵym­baev shaqyrylyp, depýtattar­dyń saýalyna tikeleı jaýap berýin senatorlar talap etken kórinedi. 

General E.Turǵymbaev de­pý­tattarǵa jol júrý qaýipsizdigine baılanysty búgingi tańda júr­gizilip jatqan jumystar týraly keńinen baıandap berdi. Jol qaýipsizdigin saqtaýǵa baılanys­ty kóptegen jańalyqtar da aıtyldy. Baıandamadan soń senatorlar general E.Turǵymbaevqa jáne otyrysqa qatysyp otyrǵan osy máselege baılanysty basqa da organdardyń basshylaryna kóptegen suraqtar berdi. Senat Tóraǵasy Qasym-Jomart Toqaev: «Bul másele únemi Senattyń baqylaýynda bolady», dep qorytty. 

Osy kúngi otyrysta senatorlar Eýrazııalyq ekonomıkalyq qoǵamdastyqqa múshe bir memlekettiń azamattary osy qoǵamdastyqqa múshe ekinshi memlekettiń aýmaǵynda eńbek etip júrgen kezinde ushyrap qalǵan jazataıym oqıǵalardy tergep-tekserý týraly jáne Qa­zaq­stan men Iordan Hashımıt Koroldiginiń arasynda Aza­mattyq qorǵanys, tótenshe jaǵdaılardyń aldyn alý jáne olardy joıý salasyndaǵy ynty­maqtastyq týraly kelisimderdi ratıfıkasııalady.

Otyrystyń sońynan sena­torlardyń ortalyq memlekettik organdarǵa joldaǵan saýaldary jarııalandy.

Jaqsybaı SAMRAT,

«Egemen Qazaqstan»