Eljan Birtanovtyń aıtýynsha, jyl saıyn 6000-ǵa jýyq stýdent elimizdiń medısınalyq joǵary oqý oryndaryna qabyldanady. Búgingi kúni densaýlyq saqtaý qyzmetkerlerin 5 memlekettik jáne 10 memlekettik emes joǵary oqý oryndary oqytady.
Medısınalyq bilim berý sapasyn arttyrý úshin bilim berý baǵdarlamasyn tolyqtaı qaıta qarap shyǵý kerek.
«Úkimet joǵary oqý oryndarynyń, onyń ishinde medısınalyq ýnıversıtetterdiń derbes bolýyn quptap otyr. Iаǵnı ýnıversıtetter naryq suranysyna qaraı qajetti baǵdarlamany zamanaýı bilimge negizdep, ózderi jasaıdy. Atap aıtqanda, dárigerlik qyzmetpen qatar zertteý jumystaryn júrgizetin klınısıst dárigerlerge degen suranys bar. Jyldyń sońyna deıin biz barlyq ýnıversıtetterimizdi kommersııalyq emes aksıonerlik qoǵamǵa aınaldyramyz», — dedi E. Birtanov.
Nátıjesinde ýnıversıtetter memleketke belgili bir paıyzben salyq tólemeıdi, olardyń tapqan bar qarajaty joǵary oqý ornynyń ózine qalady.
Medısınalyq bilim berý sapasyn arttyrý maqsatynda 2016 jyldan bastap medısınalyq jáne farmasevtıkalyq bilim berý jáne adam resýrstaryn basqarý júıesin jańǵyrtý jobasy qolǵa alynǵan edi. Osy joba aıasynda «Nazarbaev Ýnıversıteti» AQ úlgisi negizinde álemdik 500 úzdik ýnıversıtetter qataryna kiretin AQSh, Shvesııa, Italııa, Túrkııa, Lıtva jáne Polshanyń medısına mektepteri tartyldy.
«Bes memlekettik joǵary oqý oryndarynyń árqaısysynda osy elderdiń ýnıversıtetterinen seriktesi bar. Qazir árbir ýnıversıtettiń birinshi prorektory osy sheteldik ýnıversıtettiń ókili bolyp tabylady. Olardyń mindeti - bilim berý baǵdarlamalaryn, joǵary oqý oryndaryn basqarý joldaryn ózgertý, sheteldik oqytýshylardy tartý, stýdenttik almasý men ǵylymı-bilim berý qyzmetin kúsheıtý», — dedi mınıstr.
Mınıstr sondaı-aq, qabyldaý kezinde stýdentterge qoıylatyn talaptardyń kúsheıetinin de atap ótti.
«Kelesi jyldan bastap bolashaq dárigerlerdiń psıhologııalyq múmkindikterine qosymsha emtıhandar jáne stýdentterdi mindetti syrtqy baǵalaý júıesi engiziledi. Iаǵnı, oqý barysynda jáne aıaqtalǵannan keıin stýdentter baǵalanady, al dıplomdar JOO-nyń qalaýy boıynsha emes, syrtqy baǵalaý nátıjeleriniń negizinde beriletin bolady», — dedi E. Birtanov.
Psıhometrııalyq testileý bolashaq dárigerdiń psıhologııalyq múmkindikteri men ıkemdilikterin anyqtaýǵa baǵyttalǵan. Stýdenttiń adamgershilik qasıetterine, qarym-qatynas daǵdylaryna, sabyrlylyǵyna, salmaqty dene eńbegine qabilettiligine nazar aýdarylady.
«Bul – óte mańyzdy irikteý. Bul – álemdik tájirıbe. Atalǵan jumystardy sapaly dárigerlerdi daıarlap, keleshekte eń jaqsy nátıjelerge qol jetkizý maqsatynda iske asyryp otyrmyz», — dedi mınıstr.
QR DSM medısınalyq JOO-lardyń, kolledjderdiń túlekteriniń jáne medısına qyzmetkerleriniń biliktiligin táýelsiz baǵalaý júıesin odan ári damytý maqsatynda «Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyna ınternatýra jáne rezıdentýra túlekterin, medısınalyq kolledjder túlekterin táýelsiz baǵalaý boıynsha Mınıstrliktiń quzyrettiligin bekitý turǵysynan usynys ázirledi. Mınıstrdiń aıtýynsha, bul baǵalaý nashar bilim beretin JOO-lardy anyqtaýǵa múmkindik beredi. Odan keıin olar lısenzııalarynan aıyrylady.
Sondaı-aq, E. Birtanov medısına kadrlaryn daıarlaý sapasyn jaqsartý maqsatynda medısınalyq JOO-larda kýrstan kýrsqa ótý kezindegi ortasha balǵa qoıylatyn talaptar kúsheıtilgenin atap ótti. Bul kishi kýrstarda oqyp júrgen kezdiń ózinde ıkemi bar stýdentterdi irikteýge múmkindik beredi. Máselen, 2017 jyly kýrstar arasyndaǵy ótpeli baldar kóterilip, irikteý 6-7%-dan 15%-ǵa deıin ósti.
QR DSM usynatyn taǵy bir ózgeris — medısına qyzmetkerleri mindetti sertıfıkattaýdan 5 jylda bir ret emes, úsh jylda bir ret ótetin bolady. Pılottyq testileý nátıjesi stýdentterdiń 95%-y qajetti bilimdi alyp jatqanyn kórsetti. Degenmen, praktıka kezinde alǵan bilimderiniń bir bóligin umyta bastaıdy. Elimizde bes jylda bir ret medısına qyzmetkerleri — barlyq dárigerler, medbıkeler ótetin mindetti sertıfıkattaý bar. Olar ózderiniń bilimderi men tájirıbelik daǵdylaryn dáleldep otyrýǵa mindetti. Jańa kodeks aıasynda árbir úsh jylda sertıfıkattaýdy ótkizip turý usynylǵan.
