E. Birtanovtyń aıtýynsha, búgingi tańda elimizde shamamen 240 myń medısınalyq qyzmetker bar. onyń ishinde 70 myńy — dárigerler, 170 myńy — meıirbıkeler. Sonyń ishinde dárigerlerdiń 20%, meıirbıkelerdiń 12% jekemenshik sektorda jumys isteıdi.
QR DSM málimetteri boıynsha, kadrlyq qamtamasyz etýge baılanysty qabyldanyp jatqan sharalar dáriger kadrlardyń jetispeýshiligin 2007 jyly 5,5 myń mamannan 2017 jyly 2,8 myńǵa deıin arttyrýǵa múmkindik bergenin atap ótken jón, ıaǵnı mamandar 48,7% artqan. 2020 jylǵa qaraı kadrlar tapshylyǵyn 1,9 myńǵa deıin, nemese qarastyrylǵan shtattyq birlikten 2,7% deıin tómendetý kózdelip otyr.
Medısınalyq kadrlarmen qamtamasyz etýdi odan ári arttyrý úshin QR Densaýlyq saqtaý mınıstrligi mamandardy jaldaý jáne jergilikti jerlerde ustaý úshin birqatar sharalar atqarýda. Bıyl maman tapshylyǵy 2800 adam bolǵan jaǵdaıda, ınternatýra túlekteri, emhanalarda jalpy praktıka dárigeri, hırýrg jáne terapevt bolyp jumys isteı alatyn 6000 jýyq túlek, sondaı-aq 1500 jýyq aýqymy tar maman bitirdi.
«Biz maman tapshylyǵynan úsh ese kóp túlek shyǵaramyz. Degenmen, túlekter eńbek naryǵynda jekemenshik klınıkalarǵa jumysqa ornalasýdy jón sanaıdy jáne aýyldy eldi mekender men emhanalarǵa ornalasýdy qalamaıdy», — dedi E. Birtanov.
Osyǵan oraı jergilikti atqarýshy organdarǵa óńirge joǵary jáne joǵarydan keıingi bilimi bar kadrlardy daıarlaý úshin jergilikti bıýdjet esebinen bilim berý tapsyrysyn jasaýǵa múmkindik berildi.
«Stýdentter ákimderdiń granttarymen bilim alǵannan keıin, ózderi kelgen óńirge baryp jumys isteýi kerek. Kelesi jyldan bastap grantta oqyǵan barlyq túlekterge mindetti úsh jyldyq eńbekti óteý talabyn engizemiz. Arnaıy memlekettik komıssııa olardy osy óńirlerge bóletin bolady. Memleket olardyń oqýyna aqy tólegennen keıin, olar sol jerge baryp jumys isteýi kerek», — dedi Eljan Birtanov.
Sondaı-aq, mınıstr granttardy bólý kezinde túlektiń qaıdan kelgeni, onyń úlgerimi qandaı ekeni sekildi kóptegen faktorlar eskeriletinin aıtty. Talantty, daryndy túlekter bar bolsa, olarǵa magıstratýrada, doktorantýrada oqýdy jalǵastyrýǵa múmkindik beriledi.
QR Densaýlyq saqtaý mınıstrliginiń málimetine qaraǵanda, bıyl 458 bala nemese jalpy stýdenttiń 14,7%-y, 253 rezıdent nemese jalpy rezıdenttiń 17%-y (2017 jyly 75 adam nemese 5%) jergilikti bıýdjet qarajaty esebinen oqýǵa túsken.
Mamandar aýyldy jerge qaraǵanda, qalada jumys istegendi qalaıdy. Mınıstr E. Birtanovtyń aıtýynsha, aýyldyq eldi mekenderge jumys isteýge kelgen jas mamandarǵa áleýmettik qoldaý sharalaryn qarastyrý arqyly jergilikti medısına kadrynyń jetispeýshiligin sheshýge bolady.
Osylaısha, ákimdikter aýylǵa barǵan mamandarǵa áleýmettik qoldaý kórsetip, kóterme járdemaqy, jataqhana, jeńildetilgen nesıe men jalaqylaryna 25% qosymsha aqy tóleý, tipti kommýnaldyq shyǵyn men otynmen qamtamasyz etýge mindetti.
«Biz áleýmettik qoldaý sharalaryn zańdy túrde bekittik. Búgingi tańda oqý bitirgen mamandardyń tek 40%-y oblys ákimderiniń áleýmettik qoldaýymen qamtylǵan. Biz bul kórsetkishti ulǵaıtqymyz keledi. Kelesi aptada biz bul úlesti 60%-ǵa jetkizýdi usynatyn bolamyz. Oqý bitirgen jas mamandardy aýylǵa barýǵa qyzyqtyrý úshin bizge turǵyn úı, kóterme járdemaqy, biliktiligin arttyrý úshin qarjy bólinetinine kepildik berý kerek. Bul jaǵdaıda barlyǵy jergilikti jerde jumys isteıtin kásiporyn basshylary men ákimdikterdiń qolynda», — dedi E. Birtanov.
