Jańa ındýstrııalandyrý baǵdarlamasy aıasynda zaýytta jańǵyrtý jobasy 2011 jyly bastalǵan bolatyn. Investısııa kólemi - 580 mlrd. teńge bolatyn jobanyń qýattylyǵy – jylyna 6 mln tonna munaı óńdeýge jetedi. Jańǵyrtý jáne qaıta qurý jobasy eki kezeńde júzege asyryldy. Birinshi kezeńde, kompanııa Keden odaǵynda qabyldanǵan, K4 jáne K5 ekologııalyq klasynyń (analogy Eýro-4 jáne Eýro-5) benzın jáne dızel otynynyń óndirisin qurdy. 15 tamyzda joǵary sapaly ónim shyǵara bastady. Jylyna qýattylyǵy 2 mln tonna shıkizat óndiretin RFCC katalıtıkalyq krekıng qondyrǵysyn ornatý josparlanyp, UOP amerıkandyq kompanııa tehnologııasymen jasalyndy. Al 28 qyrkúıek kúni RFCC kesheni iske qosyldy. Ol zaýyt aınalymyn ulǵaıtyp, K-4 jáne K-5 klasty sapaly benzın men dızel óndirýge múmkindik beredi.
Sondaı-aq, Nursultan Nazarbaevqa Atyraý jáne Pavlodar munaı óńdeý zaýyttarynyń jumysy jóninde baıandalyp, Qazaqstannyń munaı naryǵyndaǵy qazirgi jaǵdaı týraly málimet berildi. Baıandamany tyńdaǵan soń Elbasy ekologııalyq turǵydan taza janarmaı túrlerin paıdalanýdyń jáne onyń turǵyndar úshin qol jetimdi bolýyn qamtamasyz etýdiń mańyzdy ekenin atap ótti.
– Biz gazben júretin avtobýstar shyǵaryp jatyrmyz. Solardyń óndiris kólemin ulǵaıtý qajet. Bul ulttyq ekonomıkany yntalandyryp, ekologııaǵa keletin zııandy azaıtady. Sonymen qatar, kólikti gazǵa aýystyrý onyń ıeleri úshin de utymdy, – dedi Memleket basshysy.
Ǵalymjan ELShIBAI,
«Egemen Qazaqstan»
Shymkent
