Bul ǵımarat 1925 jyly buǵan deıin «qyrǵyz-qaısaq» atanyp kelgen ultymyzǵa «Qazaq» ataýyn qaıtaryp berý týraly tarıhı sheshim qabyldanǵan Qazaq Ortalyq Atqarý komıteti ǵımaratynyń syzba-nusqasy negizinde salynǵan. Saltanatty jıynda oblys ákimi Qyrymbek Kósherbaev:
- Bıyl biz Astana men Qyzylorda qalasynyń mereıtoıyn atap ótýdemiz. Jıyrma jyl buryn Memleket basshysy Nursultan Ábishuly Nazarbaev Táýelsiz Qazaqstannyń Elordasyn Astana qalasyna kóshirý týraly strategııalyq sheshim qabyldap, sol arqyly jasampaz memleketimizdiń tutastyǵyn qamtamasyz etti.
Qyzylorda – Jankent, Shirik-Rabat, Syǵanaq syndy ejelgi astanalardyń jáne Aq Orda men Altyn Orda sııaqty han ordalarynyń aýmaǵy, Keńes Odaǵy kezinde Qazaq Respýblıkasynyń astanasy, sondaı-aq, aǵartý, saıası jáne ónerkásiptik damý ortalyǵy boldy. Ultymyzdyń resmı «Qazaq» atalýy týraly sheshim de osy kıeli mekende qabyldandy. Bıyl Elordamyz Astananyń 20 jyldyq jáne Qyzylorda qalasynyń 200 jyldyq mereıtoılaryn qatar atap ótýdemiz. Bul Qazaqstannyń alǵashqy jáne qazirgi astanalary arasyndaǵy erekshe rýhanı baılanysty ańǵartady dep oılaımyn. Biz ulttyq qundylyqtarymyzdy saqtap ári jańǵyrtýymyz kerek,- dedi.
Byltyr Syrdarııanyń sol jaǵalaýynda jańa qalanyń qurylysy bastalǵan bolatyn. Qazirgi tańda jeke ınvestısııalardyń qarjysy esebinen 18 kópqabatty turǵyn úıdiń, «Bolashaq» ýnıversıteti korpýsynyń jáne memlekettik-jekemenshik áriptestik sheńberinde 320 oryndyq balabaqshanyń, memleket qarjysy esebinen Jastarǵa qyzmet kórsetý ortalyǵy men qajetti ınfraqurylymdardyń qurylysy júrgizilip jatyr. 2019-2020 jyldary sol jaǵalaýda birqatar kópqabatty úıler, mektepter, oblystyq kópsalaly aýrýhana, neke qııý saraıy, balabaqsha, fızıka-matematıkalyq mektep jataqhanasymen birge, saýda-oıyn saýyq keshenin salý josparlanyp otyr.
Baqtııar TAIJAN,
«Egemen Qazaqstan»
Qyzylorda oblysy
