Shekarany shegendeý týraly shartqa 2017 jylǵy 25 jeltoqsanda Astanada qol qoıylǵan bolatyn. Sharttyń negizgi maqsaty Qazaqstan Respýblıkasy men Qyrǵyz Respýblıkasy arasyndaǵy memlekettik shekara syzyǵyn shegendeýdiń quqyqtyq negizderin halyqaralyq-quqyqtyq bekitý bolyp tabylady.
Shartqa sáıkes Qazaqstan, Qyrǵyzstan jáne Qytaı shekaralarynyń túıisý núktesi shekaranyń bastapqy núktesi bolyp tabylady, al Qazaqstan, Qyrǵyzstan jáne О́zbekstan shekaralarynyń túıisý núktesi shekara syzyǵynyń sońǵy núktesi bolyp tabylady.
Shegendeý nátıjeleri boıynsha memlekettik shekaranyń uzyndyǵy 1257,07 km qurady. Shekara syzyǵynda 1055 shekaralyq baǵana (533 – Qazaqstan tarapy, 522 – Qyrǵyz tarapy) ornatyldy.
Osy Shart kúshine engennen keıin taraptar 10 jylda bir ret memlekettik shekara syzyǵynyń belgilenýine birlesip tekserý júrgizedi.
Taraptardyń eshbiri memlekettik shekara syzyǵynda osy Shartta aıtylmaǵan, memlekettik shekarany belgileıtin shekaralyq nemese ózge de belgilerdi birjaqty tártippen ornatpaıdy. Sonymen qatar árbir tarap shekaralyq belgilerdi qorǵaý jónindegi sharalar qabyldaıdy, olardyń búlinýiniń, orny aýystyrylýynyń nemese qıraýynyń aldyn alady jáne olardy kútip-ustaýdy qamtamasyz etedi.
Komıtet otyrysynda sondaı-aq «Qazaqstan Respýblıkasy, Túrikmenstan jáne О́zbekstan Respýblıkasy arasyndaǵy úsh memlekettiń memlekettik shekaralarynyń túıisý núktesiniń aýdany týraly shartty ratıfıkasııalaý týraly» zań jobasy da qaraldy.
Shartqa 2017 jylǵy 10 qarashada Samarqandta Qazaqstan Respýblıkasy, Túrikmenstan jáne О́zbekstan Respýblıkasy arasynda úsh memlekettiń memlekettik shekaralarynyń túıisý núktesiniń aýdany týraly qol qoıylǵan jáne qazaq, túrikmen, ózbek jáne orys tilderinde jasalǵan.
Sharttyń negizgi maqsaty – úsh memlekettiń memlekettik shekaralarynyń túıisý núktesiniń ornalasqan jerin aıqyndaý jáne túıisý núktesi aýdanyndaǵy memlekettik shekaralardy delımıtasııalaý.
Taraptar osy Sharttyń ajyramas bóligi bolyp tabylatyn, úsh memlekettiń shekaralarynyń túıisý núktesiniń ornalasqan jeriniń jáne túıisý núktesi aýdanynynda memlekettik shekaralar syzyqtary ótýiniń sıpattamasyn jasady.
Osy Shartty qabyldaý Qazaqstan Respýblıkasynyń memlekettik shekarasyn resimdeýdiń halyqaralyq-quqyqtyq prosesin aıaqtaýǵa, úsh memlekettiń memlekettik shekaralarynyń túıisý núktesi aýdanyndaǵy aýmaqtyq daýlardyń týyndaýy úshin yqtımal alǵysharttardy boldyrmaýǵa jaǵdaı jasaıtyn bolady.
Zań jobalary Palatanyń qaraýyna jiberildi.
Senattyń baspasóz qyzmeti
