Arystanbab pen Otyrartóbeni jalǵap turǵan 17 gektar jerde etnoortalyq, joǵary dárejeli qonaqúı, gúlzar syndy nysandar salynbaq. Qurylysqa bıýdjet qarjysymen qatar jeke ınvestorlar da tartylmaq. Nysandar paıdalanýǵa berilgende týrısterdiń Otyrar tarıhymen tolyq tanysýyna múmkindikter molaıady.
Sózimizdi kıeli Arystanbab pen Otyrartóbeden bastaýymyzdyń ózindik sebebi de bar. О́tken apta sońynda «Uly Dala Eline saıahat» jobasynyń «Jańa Jibek joly» baǵdary boıynsha qatysýshylary Túrkistan oblysyndaǵy tarıhı orynǵa kelip jetti. Sondaı-aq Mádenıet jáne sport mınıstri Arystanbek Muhamedıuly Otyrar aýdanyna arnaıy at basyn buryp, tarıhı oryndardyń búgini men erteńi jóninde maǵlumat aldy. Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasy aıasynda salynǵaly jatqan «Otyrar qalajurtynyń sapar-ortalyǵyna» «amanat hat» kapsýlasyn salý rásimine qatysty. Mınıstrdiń málimdeýinshe, sapar ortalyǵyn salýdaǵy maqsat – elimizdiń mádenı murasyn shetelderge nasıhattaýmen qatar tarıhı mádenı nysandardy qorǵaý jáne olardy saqtap qalý. Bul jolǵy shara Uly Jibek joly boıynda jatqan tarıhı ólkeni sheteldikterge tanytýdyń bastamasy. Sondaı-aq mınıstr Otyrartóbedegi qazba jumystarymen tanysyp, qaıta jańǵyrǵan Otyrar memlekettik arheologııalyq qoryq-mýzeıin aralady. Jergilikti jáne «Uly Dala Eline saıahat» ekspedısııasynyń jýrnalısterine arnap suhbat berdi.
Otyrar buǵan deıin Almaty jáne Jambyl oblystaryndaǵy kórikti jáne tarıhı oryndardy aralap ótken «Uly Dala Eline saıahat» ekspedısııasy qatysýshylarynyń sońǵy núktesi. Ekspedısııa elordamyz – Astana qalasynyń 20 jyldyǵy sheńberinde ótkizilgenin aıta keteıik. Uıymdastyrýshysy – «Kazakh Tourism» ulttyq kompanııasy. «Jańa Jibek joly» ekspedısııasynyń baǵdaryn «QazaqGeography» respýblıkalyq qoǵamdyq birlestigi iske asyrǵan. Ekspedısııa qatysýshylarynyń quramynda tájirıbeli saıahatshylar, týroperatorlardyń ókilderi, sheteldik jáne qazaqstandyq trevel-blogerler, sonymen qatar «National Geographic Rossııa» komandasynyń ókilderi bar. Qatysýshylardy ekspedısııanyń aıaqtalýymen quttyqtaǵan mınıstr óńirlerde ishki týrızmdi damytý jumysyn jalǵastyrý qajettigin atap ótti. Ekspedısııa jumysyn óskeleń urpaqqa kórsetý, sheteldik týrısterge tanystyrý da mańyzdy. Aıta ketelik, «Jańa Jibek joly» ekspedısııasy baǵdarynyń qorytyndy núktesi, ıaǵnı kóne Otyrar qalasynyń orny ashyq aspan astyndaǵy arheologııalyq eskertkish retinde IýNESKO qorǵaýyna alynǵan. Qala qırandylary arasynan kóne saraı, meshitter men úılerdi kórýge bolady, olar qalanyń aýqymy men mańyzdylyǵyn kórsetedi. Otyrarǵa taıaý áziz Arystan-bab sopynyń mazary ornalasqan. Bul jerge kún saıyn Qazaqstannyń túkpir-túkpirinen jáne shetelderden zııaratshylar men jaı týrıster kóptep keledi. 1982 jyldan bastap mazar memlekettiń qorǵaýyna alynǵan.
Ekspedısııa qatysýshylarynyń Túrkistan oblysymen tanysýy Ortalyq Azııadaǵy eń ertedegi qoryqtardyń biri Aqsý-Jabaǵylydan bastalypty. Qoryqtyń jalpy aýdany 12 gektardy quraıdy. Adamdardyń eń kóp baratyn jerleriniń biri – Aqsý shatqalynyń tereńdigi 1800 metr. Batys Tıan-Shannyń shyǵys bóliginde ornalasqan Saıram-О́gem memlekettik tabıǵı parkinde baǵdar qatysýshylary 2350 metr bıiktiktegi Saıramsý kóline toqtapty. Sondaı-aq olar Uly Jibek jolyndaǵy taǵy bir áıgili qala – Saýrannyń ornyn kórgen. Ekspedısııa qatysýshylarynyń aıtýynsha, 6 baǵdardyń qorytyndylary boıynsha fotobeıne banki, jolkórsetkish jáne jańa týrıstik baǵdarlar jasalmaq.
Ǵalymjan ELShIBAI,
«Egemen Qazaqstan»
Túrkistan oblysy
